«Մենք գիտակցում ենք, որ եվրասիական տնտեսական տարածքի շրջանակում ինտեգրացիոն գործընթացների ամրապնդման հարցում լուրջ խնդիր ունենք լուծելու: Պետք է այդ շարժման առաջամարտիկը լինենք եւ իրականացնենք այդ խնդիրը»: Եվրասիական տնտեսական հանձնաժողովի նիստի բացմանն ունեցած ելույթում այս մասին հայտարարել է փետրվարի 1-ից պարտականությունների կատարմանն անցած ԵՏՀ կոլեգիայի նախագահ Տիգրան Սարգսյանը:
Նա նշել է, որ այսօր հանձնաժողովը նոր մարտահրավերների եւ սպառնալիքների առջեւ է կանգնած:
«Այս ամենը, իհարկե, ազդում է մեր երկրների տնտեսական գործընթացների վրա: Ես վստահ եմ, որ համատեղ ուժերով ավելի դյուրին կլինի լուծել նախագահների կողմից մեր առջեւ դրված խնդիրները: Մենք պետք է ի մի բերենք գոյություն ունեցող ամբողջ փորձը եւ իմաստնություն դրսեւորենք: Վստահ եմ, որ չի կարելի կանգ առնել, հարկավոր է անընդհատ առաջ շարժվել: Միաժամանակ, մենք պետք է միասնական լինենք: Ես կանեմ հնարավոր ամեն ինչ որպեսզի այդ միասնությունը լինի մեր թիմում՝ Կոլեգիայում եւ մեր աշխատանքում»,- ընդգծել է ԵՏՀ Կոլեգիայի նախագահը: