Շրջանառության հարկի մասին» Հայաստանի Հանրապետության օրենքում լրացում կատարելու մասին օրինագիծն այսօր՝ փետրվարի 3-ին, ընդունվեց միաձայն որոշմամբ:
ԱԺ պատգամավորներից 114-ը կողմ քվեարկեցին նախագծին, դեմ եւ ձեռնպահ ոչ ոք չեղավ:
Նշենք, որ «Շրջանառության հարկի մասին» օրենքում համապատասխան փոփոխությունների նախագծով նախատեսվում է Հայաստանում երկրորդային հումքի վերամշակման շրջանառության հարկը 5 տոկոսից իջեցնել 1,5 տոկոս։
Ըստ օրինագծի հեղինակ Վարդան Այվազյանի՝ նման նյութերի ցանկում առաջարկում են ընդգրկել օգտաթափոնքը՝ այդ թվում պատրաստի ապրանքների ու նյութերի մնացորդները, որոնք կորցրել են իրենց սկզբնական հատկանիշները։ Հարկն առաջարկում են նվազեցնել, որովհետեւ երկրորդային հումքի վերամշակումը պետք է բնապահպանական գերակայություն լինի ցանկացած պետության համար։ Բացի դրանից ծագման պատճառով այդ հումքի համար ապրանքագիր ներկայացնելը հաճախ հնարավոր չէ։ «Մենք առաջարկում ենք, որ նման նյութերի ցանկը Կառավարությունը սահմանի»,- հավելել է Այվազյանը։
111 կողմ ձայնով երկրորդ ընթերցմամբ ընդունվեց նաեւ «Բարձրագույն եւ հետբուհական մասնագիտական կրթության մասին» Հայաստանի Հանրապետության օրենքում լրացումներ եւ փոփոխություններ կատարելու մասին օրինագիծը, որը ներկայացրել է Կառավարությունը: