Շարունակվում են աշխատանքները ատոմակայանի երկրորդ էներգաբլոկի շահագործման ժամկետի երկարացման առումով, որի արդյունքում` կայանի գործարկումը կերկարացվի մինչեւ 2027 թվականը: Այս մասին փետրվարի 3-ին, Արժույթի միջազգային հիմնադրամի հայաստանյան առաքելության նորանշանակ ղեկավար Հոսեյն Սամիեիի եւ Հայաստանում ԱՄՀ մշտական ներկայացուցիչ՝ տիկին Թերեզա Սանչեսի հետ հանդիպման ժամանակ նշել է ՀՀ էներգետիկայի եւ բնական պաշարների նախարար Երվանդ Զախարյանը։
Նախարարությունից NEWS.am-ին հայտնում են, որ հանդիպման ժամանակ նախարարը ներկայացրել է Հայաստանի էներգետիկ համակարգի ընթացիկ իրավիճակը եւ զարգացման հեռանկարները։
Ե. Զախարյանը հյուրերին տեղեկացրել է, որ անցած տարի կառավարությունը հաստատել է էներգետիկ համակարգի երկարաժամկետ՝ մինչեւ 2036թ. զարգացման ծրագիրը, որի համաձայն նախատեսվում են ներդրումային տարբեր նախագծեր վերականգնվող էներգետիկայի, ենթակայանների արդիականացման, գործող հզորությունների ավելացման եւ այլ ոլորտներում։ Շարունակվում են աշխատանքները ատոմակայանի երկրորդ էներգաբլոկի շահագործման ժամկետի երկարացման առումով։ Դրանց արդյունքում` կայանի գործարկումը կերկարացվի մինչեւ 2027թ.։ Մինչ այդ, աշխատանքներ կիրականացվեն նոր ատոմային բլոկի կառուցման ուղղությամբ։ Նախատեսվում է նաեւ ջերմային երկու նոր կայանների կառուցում։
Հյուրերի խնդրանքով Ե. Զախարյանն անդրադարձել է «Հայաստանի էլեկտրական ցանցեր» ընկերության ֆինանսական վիճակին։ Նախարարը նշել է, որ սեփականատիրոջ փոփոխությունից հետո ընկերությունում առկա են դրական զարգացումներ ինչպես կորուստների կրճատման, այնպես էլ` կառավարման արդյունավետության բարձրացման առումով։
Նախարարը հյուրերին տեղեկացրել է նաեւ էներգահամակարգի մյուս ընկերությունների ֆինանսական վիճակի բարելավման ուղղությամբ կատարվող քայլերի, տարածաշրջային ինտեգրացման ոլորտում իրականացվող աշխատանքների մասին։