Էրդողանը «ծիծաղելի» է համարել Սիրիա թուրքական ներխուժման մասին Ռուսաստանի հայտարարությունները
Թուրքիայի նախագահ Ռեջեփ Թայյիփ Էրդողանը «ծիծաղելի» է համարել Ռուսաստանի Պաշտպանության նախարարության հայտարարությունները Սիրիայի տարածք թուրքական նախապատրաստվող ներխուժման վերաբերյալ:
«Ես ծիծաղում եմ Ռուսաստանի այդ հայտարարության վրա, նրա խոսքերն է մեջբերում AFP-ն: Ներկայումս ավելի շուտ Ռուսաստանն է ներխուժել Սիրիա»:
Թուրքիան չի նախատեսում հարեւան Սիրիայում ռազմական գործողության իրականացում, ավելի վաղ հաղորդել էր Reuters գործակալությունը` վկայակոչելով թուրքական կառավարության աղբյուրին:
«Թուրքիան չի պատրաստվում եւ չի մտածել Սիրիայում ռազմական գործողություն անցկացնելու կամ ցամաքային ներխուժում իրականացնելու մասին», - նրա խոսքերն է մեջբերում գործակալությունը, տեղեկացնում է ՏԱՍՍ-ը:
Մեկ օր առաջ Ռուսաստանի Պաշտպանության նախարարությունը Թուրքիային կասկածել էր Սիրիա ռազմական ներխուժման նախապատրաստվելու մեջ: «Մենք լուրջ հիմքեր ունենք կասկածելու, որ Թուրքիան ինտենսիվորեն նախապատրաստվում է ինքնիշխան պետության` Սիրիայի Արաբական Հանրապետության տարածք ռազմական ներխուժման… Մենք Սիրիայի տարածքում թուրքական զինված ուժերի ակտիվ գործողությունների գաղտնի նախապատրաստության գնալով նորանոր նշաններ ենք արձանագրում», - ասել է ՌԴ Պաշտպանության նախարարության պաշտոնական ներկայացուցիչ Իգոր Կոնաշենկովը: