Լիբանանի խորհրդարանի պատգամավորներն այսօր նորից չեն կարողացել երկրի նախագահ ընտրել։ «Ալ Վատանիա» ազգային լրատվական գործակալության տեղեկություններով՝ քվորումի բացակայության պատճառով խոսնակ Նաբիհ Բերրին ընտրությունները հետաձգել է 35-րդ անգամ անընդմեջ։ Այս անգամ դրանք կայանալու են 2016թ. մարտի 2-ին։
Խորհրդարանում հավաքված օրենսդիրների քանակը բավական չի եղել քվեարկություն անցկացնելու համար։ Դահլիճում ներկա են եղել 86 անհրաժեշտ պատգամավորներից 56-ը (ընդհանուր քանակը՝ 128), փոխանցում է ՏԱՍՍ-ը։
Երկրի նախագահի պաշտոնը թափուր է այն ժամանակվանից ի վեր, երբ 2014թ. մայիսի 25-ին այն լքել էր Միշել Սուլեյմանը։ Համաձայն Լիբանանի կրոնական կառուցվածքի՝ հանրապետության նախագահն առաջադրվում է մարոնիների համայնքից, որոնք տեղի քրիստոնյաների շրջանում մեծամասնություն են կազմում։
Խորհրդարանի խոսնակ Բերրիի նախաձեռնությամբ խորհրդարանական բլոկների առաջնորդները 2015թ. սեպտեմբերից քննարկումներ են անցկացնում թեկնածուի հարցում համաձայնության գալու շուրջ, որը կգոհացնի ե՛ւ քրիստոնյաներին, ե՛ւ մուսուլմաններին։