ՆԱՏՕ-ն ավարտին է հասցնում նոր ռազմավարության մշակումը, որն ուղղված է բլոկի անդամների դեմ հիբրիդային պատերազմ սկսելու դեպքում որոշումներ կայացնելու գործընթացին, գրում է Gazeta-ն՝ վկայակոչելով The Wall Street Journal-ը։

Հաղորդվում է, որ հիբրիդային պատերազմի հակազդեցության ռազմավարությունը պատրաստ կլինի մինչեւ հուլիսին կայանալիք Վարշավայի գագաթնաժողովը։ Դրանում թվարկված են լինելու բոլոր միջոցները, որոնք դաշինքը պետք է ձեռնարկի ոչ բարեկամ պետության կողմից ճնշում գործադրելու դեպքում։  Մասնավորապես օգնությունը կարող է ներառել ցանցահենների եւ քարոզչության դեմ պայքարի միջոցները եւ արագ արձագանքման ուժերի տեղակայումը։

«Հիբրիդային պատերազմը գործունեության տարբեր տեսակների համատեղում է»,- պարզաբանել է Չեխիայի բանակի գեներալ, ՆԱՏՕ-ի զինվորական հանձնաժողովի ղեկավար Պետեր Պավելը։

Նրա խոսքով՝ այդ պատերազմի գլխավոր նպատակն է ազդեցություն գործել, որը կլինի բավական ուժեղ, սակայն ոչ բավարար, որպեսզի գործի հավաքական անվտանգության մասին 5-րդ հոդվածը։ Դրանով իսկ հնարավոր է իրականացնել նշված խնդիրները՝ հակառակորդի կողմից պատասխան քայլեր չսադրելով։