Եթե ռուսական 102-րդ ռազմաբազայում լինում են խախտումներ, այդ խախտողները պետք է պատասխանատվության ենթարկվեն: Այս մասին, այսօր՝ փետրվարի 9-ին, Երեւանի պետական համալսարանում ուսանողների եւ դասախոսների հետ հանդիպումից հետո, լրագրողների հետ զրույցում նշել է Հայաստանի պաշտպանության նախարար Սեյրան Օհանյանը:
Հարցին, թե Գյումրիում ռուսական 102-րդ ռուսական ռազմաբազայում կարգ ու կանոն հաստատելու ուղղությամբ ինչ է արվում՝ հաշվի առնելով, որ ռուս զինծառայողների կողմից երբեմն արարքներ են կատարվում, որոնք անհանգստացնում են գյումրեցիներին, նախարարը պատասխանել է. «Մենք 102-րդ ռազմաբազայի հետ համագործակցում ենք, 102-րդ ռազմաբազան մտնում է միացյալ զորախմբի կազմի մեջ, եւ մեր համագործակցության շրջանակներում մենք անընդհատ աշխատանքներ տանում ենք ոչ միայն մեր օպերատիվ-մարտական պատրաստության պլանն իրագործելիս, այլ նաեւ մեր հարաբերությունների շրջանակներում, հատկապես, նաեւ տեղի բնակչության հետ կապի ամրապնդման ուղղությամբ: Եթե լինում են խախտումներ, այդ խախտումները պետք է իրենց պատասխանը ստանան: Հրամանատարական կազմում տեղի ունեցած փոփոխությունները նաեւ կատարվել են դրա համար, որ դեռեւս գոյություն ունեցող այդ տիպի թերությունները վերացվեն»: