Հայաստանում արդեն երկրորդ հողմային էլեկտրակայանն է գործում: Այս մասին NEWS.am-ի թղթակցի հետ զրույցում հայտնեց Հայաստանի էնեգետիկայի եւ բնական պաշարների փոխնախարար Հայկ Հարությունյանը:
Քաջարան քաղաքի մերձակայքում տեղակայված «Արաց» հողմակայանը 2015 թվականի մարտին Հայաստանի Հանրային ծառայությունները կարգավորող հանձնաժողովից լիցենզիա է ստացել, իսկ ցանցին միացել է ամռանը:
Ըստ փոխնախարարի, կայանի հզորությունը մեծ չէ՝ 285 կՎտ, սակայն փաստը, որ հանրապետությունում եւս մեկ հողմակայան է գործարկվել, արդեն ուրախալի է: Հատկանշական է, որ այն կառուցվել է ներդրողների սեփական միջոցներով:
Նշենք, որ Հայաստանի եւ Հարավային Կովկասի առաջին հողմային էլեկտրակայանը՝ 2.64 ՄՎտ հզորությամբ «Լոռի 1»-ը, բացվել է 2005 թվականին, Իրանի կառավարության տրամադրած դրամաշնորհային միջոցներով:
