Պաշտոնական տեղեկությունների համաձայն՝ Հայաստանում ոչ պարենային արտադրանքների գները մեկ տարում 1.7 տոկոսով աճել են: Ընդ որում, որոշ ապրանքներ թանկացել են, իսկ մյուսները՝ էժանացել: Թանկանալու դեպքում ամեն ինչ պարզ է, իսկ ահա զանգվածային էժանացումները բնորոշ չեն մեր առեւտրին: Սակայն դա հարկադրված միջոց է: Պաշտոնական տեղեկություններով՝ անցյալ տարի խանութներում ապրանքների վաճառքի ֆիզիկական ծավալները կրճատվել են 13.4 տոկոսով, իսկ տոնավաճառներում՝ 3.6 տոկոսով:
Պատճառն այն է, որ մեր բնակչության ֆինանսական եկամուտները սպառվել են տրանսֆերտների կրճատման պատճառով: Դա բնականաբար հանգեցրել է վճարունակ պահանջարկի անկման, այդ թվում՝ հագուստի եւ կոշիկի համար: Հայ գործարարներից մեկի խոսքով՝ ներքին շուկայում առանձին ապրանքատեսակների վաճառքի անկումը իր ձեռնարկությունում կազմել է 30-40 տոկոս:
Հայրենական թեթեւ արդյունաբերության խնդիրները քիչ չեն: Ընդ որում, դրանցից շատերը չեն լուծվում արդեն քառորդ դար: Հիմա դրանց ավելացել է հերթական խնդիրը: Հայաստանի թեթեւ արդյունաբերության գործատուների միության նախագահ Հովսեփ Պողոսյանի խոսքով՝ դժվարացել է Ռուսաստանում ապրանքների սպառումը:
Սկզբում ներկայացնենք 2013թ. Հայաստանի արտաքին առեւտրի տվյալները, երբ Ռուսաստանի տնտեսական խնդիրները նոր-նոր էին սկսվում: Այդ տարի թեթեւ արդյունաբերության ներմուծման ընդհանուր ծավալները մեր երկրում կազմում էին մոտ 190 մլն դոլար:
Սակայն այդ ապրանքների արտահանումը շատ ավելի փոքր չափերի էր հասնում՝ մոտ 41 մլն դոլար, որից Ռուսաստանին բաժին էր ընկնում 3 մլն դոլարից քիչ ավելին: Դա ընդհանուր ֆոնին փոքր թիվ է, սակայն մեր գործարարների համար դա քիչ փող չէ:
Բանն այն է, որ Ռուսաստանում մեծացող գնաճը անդրադարձել է բնակչության վճարունակության վրա: Դրա հետեւանքով ապրանքների վաճառքի ֆիզիկական ծավալը անցյալ տարի պակասել է 10 տոկոսով: Այսինքն՝ ռուսաստանցիները սկսել են ավելի քիչ ապրանքներ գնել, այդ թվում՝ Հայաստանից ներմուծած ապրանքներ:
Երկու երկրների միջեւ տարբերությունն այն է, որ Հայաստանում կրճատվել են բնակչության անվանական եկամուտները, իսկ Ռուսաստանում դրանք ամեն դեպքում աճել են: Գնաճն այնտեղ առաջ է եկել ինչպես մի շարք ապրանքների ռեսուրսների կրճատման, այնպես էլ դոլարի նկատմամբ ռուբլու փոխարժեքի նվազման հետեւանքով եւ այլն:
Ռուսաստանցիները սկսել են ավելի շատ գումար ծախսել սննդամթերքի համար, որը 2 տարում թանկացել է 32 տոկոսով: Նույն այդ ժամանակաշրջանում երկրում իրական աշխատավարձը պակասել է 13.6 տոկոսով : Ինչպես հայտնի է, դա անդրադարձել է Ռուսաստանում հայկական կոնյակի եւ թեթեւ արդյունաբերության նշված ապրանքների իրացման վրա: Այսինքն՝ վերջիններիս իրացումը պակասել է ինչպես ներքին շուկայում, այնպես էլ արտաքին: Հովսեփ Պողոսյանի խոսքով՝ հիմա մեր ձեռներեցները փորձում են ելք գտնել ստեղծված իրավիճակից, սակայն դեռեւս անարդյունք: