Լեւոն Հայրապետյանի շուրջ ծավալվող իրադարձություններն իրենց դաժանությամբ արդեն սադիզմի դրսեւորումներ են ստանում: Այդ մասին ասվում է «Ազատություն Լեւոն Հայրապետյանին» քաղաքացիական նախաձեռնության տարածած հայտարարության մեջ:
«Երկրորդ կարգի հաշմանդամ, 4 ինսուլտ, 2 ինֆարկտ տարած, քաղցկեղով տառապող այս մարդուն ապրիլի 15-ին Մոսկվայի Բուտիրսկայա գաղութում տեղափոխել են այնպիսի բանտախուց, որում տեղերի բացակայության պատճառով կալանավորները հերթով են քնում: Բանանային հանրապետություններից բացի աշխարհի եւ որեւէ այլ երկրում նման բան պատկերացնելն անգամ անհնար է:
Փաստաբանն արդեն բողոքարկել է դատարանի որոշումը, սակայն մինչեւ նոր լսումները Լեւոն Հայրապետյանին պետք է դեռ պահպանել ապրելու կարողությունը:
Ոչ պակաս ապշեցնող է նաեւ Ռուսաստանի ազդեցիկ հայերի անգործությունը: Նրանք կարծես կորցրել են խոսելու ունակությունը, թեեւ միասնության եւ եղբայրության մասին վերամբարձ կենացներ ասելու առիթը երբեք բաց չեն թողնում:
Հիվանդությունների այն ցանկը, որոնցով տառապում է գործարար Լեւոն Հայրապետյանը, ռուսական բանտային պայմաններում լրջագույն սպառնալիք են նրա կյանքին:
Հայրապետյանը մեղադրվում էր ահաբեկչության համար ցմահ ազատազրկման դատապարտված Բաշկիրիայի նախկին սենատոր Իգոր Իզմեստեւի մորից խարդախությամբ 700 հազար դոլար յուրացնելու համար։ Ըստ մեղադրող կողմի, նա մոլորեցրել է նախկին սենատորի մորը, խոստանալով փողի դիմաց քայլեր ձեռնարկել որդու պատժաչափը մեղմելու համար։
Մեղադրող կողմի փաստարկները չափազանց անհամոզիչ են, դրանք իրավաբանների եւ գործին ծանոթ մարդկանց մոտ միայն ծիծաղ են առաջացրել: Ակնհայտ է Լեւոն Հայրապետյանի դեմ հարուցված գործի պատվիրված բնույթը՝ նրան կալանավորելու նպատակով»:
