Իրանի տարածաշրջանային դիրքը վերջին մեկ-երկու տարիներին զգալի փոխվել է: Իրանն ավելի է մոտեցել ատոմային զենքի ստեղծմանը, եւ այժմ նրա դիրքերը կոշտացել են: Այդ մասին սեպտեմբերի 27-ին լրագրողների հետ զրույցում հայտարարել է «Նորավանք» գիտակրթական հիմնադրամի փոխտնօրեն Սեւակ Սարուխանյանը:
Ըստ փորձագետի՝ Իրանն ու Ռուսաստանը երբեք էլ հուսալի գործընկերներ չեն եղել, ուղղակի համագործակցել են: «Հիմա իրավիճակը փոխվել է: Նոր նախագահի պայմաններում, Ռուսաստանը գնում է հարաբերությունների խորացման Արեւմուտքի հետ, եւ այս պայմաններում կոշտացնում է հարաբերությունները Իրանի հետ: Այդ կոշտացումը փոխադարձ է»,- ասել է նա:
Մեկնաբանելով ՌԱՀՀԿ տնօրեն Ռիչարդ Կիրակոսյանի հայտարարությունը, թե Հայաստանը կարող է միջնորդ լինել Իրանի եւ այլ տերությունների միջեւ՝ Սեւակ Սարուխանյանը նկատեց, թե չկա որեւէ ռացիոնալ հիմք նման ենթադրություն անելու համար: «Հայաստանը չի կարող լինել կամուրջ, միջնորդ, Ռուսաստանի եւ Իրանի միջեւ: Հայաստանը փոքր պետություն է, եւ չեմ պատկերացնում, թե ինչու պետք է դիմեն Հայաստանի օգնությանը:
Նույնը նաեւ ԱՄՆ-ի դեպքում: Նույն ԱՄՆ-ը եւ Իրանը տարեկան մի քանի անգամ գաղտնի հանդիպում են»,- ասել է փորձագետը: Նա որպես բացառություն նշել է Վրաստանի դեպքը՝ նկատելով, որ ռուս-վրացական հարաբերություններում Հայաստանը կարող է միջնորդ լինել:
Խոսելով ղարաբաղյան հնարավոր պատերազմում Իրանի միջամտելու հնարավորության մասին՝ Սեւակ Սարուխանյանը նկատել է, թե «Իրանը հուսալի դաշնակից չէ Հայաստանի համար եւ չի ներգրավվի հնարավոր պատերազմին»:
