Առաջնահերթություն է դարձել ղարաբաղա-ադրբեջանական շփման գծում միջադեպերի հետաքննության մեխանիզմի ստեղծումը: Այս մասին, այսօր՝ ապրիլի 25-ին, Հայաստանի արտաքին գործերի նախարար Էդվարդ Նալբանդյանի հետ հանդիպման ժամանակ նշել է Ֆրանսիայի` Եվրոպական հարցերով պետքարտուղար Արլեմ Դեզիրին:
ԱԳՆ-ից NEWS.am-ին հայտնում են, որ պետքարտուղար Դեզիրը նախարար Նալբանդյանին տեղեկացրեց, որ նախօրեին Փարիզում տեղի ունեցած՝ Հայոց ցեղասպանության տարելիցին նվիրված միջոցառումներին մասնակացելուց հետո ուղերեւորվել է օդանավակայան՝ Երեւան մեկնելու եւ Ծիծեռնակաբերդի հուշահամալիրում Մեծ Եղենի զոհերի հիշատակին իր հարգանքի տուրքը մատուցելու նպատակով:
Էդվարդ Նալբանդյանն ընդգծեց, որ Հայաստանում բարձր են գնահատում Ֆրանսիայի սկզբունքային դիրքորոշումը՝ Հայոց ցեղասպանության հարցում, եւ այն, որ Ֆրանսիայում դեռ 2001թ. օրենքի ուժով ճանաչվել է Հայոց ցեղասպանությունը։ Նա հավելեց, որ Հայաստանում շնորհակալությամբ են հիշում նախագահ Օլանդի մասնակցությունը Երեւանում Ցեղասպանության 100-րդ տարելիցին նվիրված միջոցառումներին։
Էդվարդ Նալբանդյանը զրուցակցին ներկայացրեց Ադրբեջանի կողմից Լեռնային Ղարաբաղի դեմ սանձազերծված լայնածավալ ռազմական գործողությունների հետեւանքները եւ այդ համատեքստում կարեւորեց միջազգային հանրության ջանքերը՝ դրանք հաղթահարելու, նման զարգացումները հետագայում բացառելու եւ համապատասխան պայմաններ ստեղծելու՝ բանակցությունների, հիմնախնդրի բացառապես խաղաղ ճանապարհով կարգավորման ուղղությամբ։
Երկուստեք շեշտվեց, որ հիմնահարցի կարգավորումը չունի ռազմական լուծում։ Հարլեմ Դեզիրը վստահեցրեց, որ, որպես ԵԱՀԿ Մինսկի խմբի համանախագահ, Ֆրանսիան շարունակելու է ակտիվորեն ներգրավված լինել ղարաբաղյան հակամարտության խաղաղ կարգավորման գործընթացում։
Էդվարդ Նալբանդյանը եւ Հարլեմ Դեզիրը քննարկեցին հայ-ֆրանսիական հարաբերությունների օրակարգային հարցեր: