Այլեւս ոչ ոք չպետք է կասկածի Ադրբեջանի ցուցաբերած ագրեսիայի մեջ։ Այս մասին ապրիլի 25-ին կայացած մամուլի ասուլիսին ասել է Եվրախորհրդարանի պատգամավոր Ֆրանկ Էնգելը։
Նրա խոսքով՝ ադրբեջանական ագրեսիայի վառ ապացույց են դարձել տարեց մարդկանց խոշտանգումները, որոնց ականջները կտրել էին, ինչպես նաեւ զինծառայողների գլխատման փաստը, ինչով Ադրբեջանական գյուղերում հպարտանում էին զինծառայողները։ «Այս օրերին մենք նշում ենք Հայոց ցեղասպանության 101-րդ տարելիցը։ Մենք պետք է հասկանանք, որ կարող է տեղի ունենալ եւս մեկ ցեղասպանություն։
Միջազգային հանրության պարտականությունը պաշտպանելն է։ Լեռնային Ղարաբաղը ոչնչացման սպառնալիքի առջեւ է։ Այդ ամենը կարելի է կանխել Լեռնային Ղարաբաղը որպես անկախ պետություն ճանաչելու միջոցով»,- ընդգծել է Էնգելը։
Նա նշեց, որ այս պահին բանակցությունները կասեցվել են։ «Հիմա պետք է դնել Լեռնային Ղարաբաղի անկախության ճանաչման հարցը։ Միջազգային հանրությունը պարտավոր է պաշտպանել Ղարաբաղի բնակչությանը։ Ակնհայտ է, որ Ադրբեջանի միակ նպատակն է ոչ միայն ոչնչացնել Ղարաբաղը, այլ նաեւ բոլորին, ով այնտեղ ապրում է»,- նշել է Ֆրանկ Էնգելը։
