Միջազգային հանրությունը պետք է ճանաչի Լեռնային Ղարաբաղի Հանրապետության անկախությունը, որպեսզի կանխի այդ երկրի բնակչության գոյության սպառնալիքը։ Այս մասին ապրիլի 25-ին կայացած մամուլի ասուլիսին ասել է Եվրախորհրդարանի պատգամավոր Ֆրանկ Էնգելը։
Նրա խոսքով՝ այդ հարցով բոլոր իրավաբանական դատողությունները սահմանափակ բնույթ են կրում։ «Համանման իրավիճակների հետ բոլոր համեմատությունները, ինչպես, օրինակ, Կոսովոյի դեպքում, սահմանափակ բնույթ են կրում։ Դա նշանակում է, որ մենք Եվրախորհրդարանում եւ ազգային խորհրդարաններում մեր գործընկերների հետ պետք է ջանքեր գործադրենք, որպեսզի հասնենք ԼՂՀ անկախության ճանաչմանը։ Եթե դա տեղի չունենա, Լեռնային Ղարաբաղը մեծ վտանգի մեջ կհայտնվի, եւ դա այն արդյունքը չէ, որը պետք է տեղ գտնի 2016 թվականին քաղաքակիրթ աշխարհում եւ ոչ էլ դրանից հետո»,- ընդգծել է Էնգելը։