Եթե մի երկիր ուզում է առանձին պետության բարեկամը լինել, նա չպետք է զենք վաճառի այդ պետության թշնամուն։ Հենց դա է հիմա անում Ռուսաստանը։ Այս մասին ապրիլի 25-ին կայացած մամուլի ասուլիսին ասել է Եվրախորհրդարանի պատգամավոր Ֆրանկ Էնգելը։
Նա նշել է, որ Հայաստանում եւ Ղարաբաղում իրեն ասում են, թե Ռուսաստանը պարբերաբար կրկնում է, թե իրենց կողքին է, որ իրենց դաշնակիցն է, սակայն հայ զինվորներն ու խաղաղ բնակիչները զոհվում են հենց ռուսական կողմից Ադրբեջանին վաճառած զենքի պատճառով։ «Մենք բոլորս գիտենք, որ Ռուսաստանն անում է հնարավոր ամեն բան, որպեսզի մի քանի երկրների ներգրավի ԵՏՄ, եւ Ադրբեջանը ցանկալի մասնակիցներից մեկն է։ Միգուցե հենց այդ փաստից է մտահոգված Ռուսաստանը, որպեսզի լայն առեւտրային հարաբերություններ ունենա Հայաստանի հետ»,- հավելել է Ֆրանկ Էնգելը։