Եվրոպական ինստիտուտները պետք է պահանջեն, որպեսզի Ադրբեջանը համաձայնի շփման գծի մշտադիտարկման մեխանիզմին: Այս մասին ապրիլի 25-ին կայացած մամուլի ասուլիսում հայտարարել է Եվրախորհրդարանի պատգամավոր Ֆրանկ էնգելը:
Նրա խոսքով, կոնկրետ քայլեր են իրականացվել այն առումով, որ ԵԱՀԿ Մինսկի խմբի միջնորդներն առաջարկել են ղարաբաղյան հակամարտության գոտու շփման գծի միջադեպերի մշտադիտարկում անցկացնել:
«Մենք գիտենք, որ Հայաստանն ու Լեռնային Ղարաբաղը հավանության են արժանացրել այս առաջարկը, իսկ Ադրբեջանը դեմ է: Եվրոպական կառույցները պետք է բոլոր ջանքերը գործադրեն եւ պահանջեն, որպեսզի Ադրբեջանը համաձայնի իրականացնել այդ մեխանիզմը: Եթե Ադրբեջանը շարունակի դեմ հանդես գալ, մենք կասկածի տակ կդնենք այդ երկրի հետ մեր հարաբերությունների ամբողջ սեկտորը՝ լինի դա «Արեւելյան գործընկերության», «Եվրանեսթ»-ի կամ այլ ձեւաչափերի շրջանակում»,- ընդգծել է Ֆրանկ Էնգելը:
