Նախնական տեղեկություններով՝ Հալաբյանում պայթյունից հղի կին եւ դեռահաս է վիրավորվել (ֆոտո, լրացվող)

Հայաստանի արտակարգ իրավիճակների նախարարության նախնական տվյալներով, այսօր՝ ապրիլի 25-ին Հալաբյան փողոցում ավտոբուսում հնչած պայթյունի հետեւանքով կա մեկ զոհ։ (ֆոտոռեպորտաժ)

ԱԻՆ կայքն ավելի վաղ հայտնել էր 2 կամ 3 զոհի մասին։

Առողջապահության նախարար Արմեն Մուրադյանը NEWS.am-ի թղթակցին հայտնել է, որ «Արմենիա» բուժկենտրոն են տեղափոխել վեց անձանց, այդ թվում՝ մեկ հղի կնոջ, 14 տարեկան տղայի, երեք տղամարդու եւ մեկ կնոջ։ Այս պահին հղի կինը տոմոգրաֆիա է անցնում, 14 տարեկան տղան թոքերի սալջարդ ունի, մեկ մարդու այս պահին վիրահատում են, վերջույթի կոպիտ վնասվածքով։ Հինգը եղել են ծանր վիճակում, մեկը՝ ծայրահեղ ծանր վիճակում։

Այս պահի դրությամբ տուժածներից մեկը վիրահատարանում է, հիվանդանոց է ընդունվել շոկային վիճակում, բժիշկները պայքարում են նրա կյանքի համար: Մյուսները գտնվում են վերակենդանացման բաժանմունքում:

Նշենք, որ պայթյունը տեղի է ունեցել Հալաբյան փողոցի թիվ 11 շենքի մոտ, թիվ 63 երթուղու «Բոգդան» մակնիշի ավտոբուսում։

Դեպքի վայր են ժամանել ԱԻ նախարար Արմեն Երիցյանը, ոստիկանապետ Վլադիմիր Գասպարյանը, փոխոստիկանապետ Հունան Պողոսյանը, գլխավոր դատախազ Գեւորգ Կոստանյանը, առողջապահության նախարար Արմեն Մուրադյանը, քննչական կոմիտեի նախագահ Աղվան Հովսեփյանը, Երեւանի քաղաքապետ Տարոն Մարգարյանը։։

Դեպքի վայրում ոստիկանությունն ու փրկարար ծառայությունը պայթյունի հանգամանքների մասին որեւէ տեղեկատվություն չեն հայտնում։

Ինչպես պատմել է դեպքի ականատեսներից մեկը NEWS.am-ի թղթակցին, հնչել է երկու պայթյուն։

Մեր տեղեկություններով, վիրավորներից մի քանիսին հիվանդանոց են հասցրել պատահական անցորդները, երկուսին՝ ժամանած «Շտապօգնության» մեքենաները։ Այս պահին վիրավորների առողջական վիճակի մասին դեռ տեղեկություններ չեն հաղորդվում։

Ավտոբուսը սպասարկում է թիվ 63 երթուղին` Նոր Նորքի 9-րդ զանգվածից մինչեւ 15-րդ թաղամաս: