Մեկ-երկու ժամից պարզ կլինի, թե ինչ է պայթել ավտոբուսում Հալաբյան փողոցում։ Այդ մասին լրագրողների հետ զրույցում ասել է Հայաստանի ոստիկանապետ Վլադիմիր Գասպարյանը։

«Այս պահին պարզ է, որ գազի կամ դիզելային վառելիքի պայթյուն չի եղել։ Եղել է ֆուգասային տիպի, ոչ բեկորային, ալիքավոր պայթյուն, բայց այս պահին կոնկրետ չենք կարող ասել, քանի որ 10 րոպե հետո կարող է նախնական վակածը փոխվել»,- նշել է Գասպարյանը՝ հավելելով, որ պայթյունը եղել է ավտոբուսի ներսում։

Այս պահի դրությամբ դեպքի վայրում աշխատում են մասնագետները։ Հնարավոր ահաբեկչության մասին հարցին նա պատասխանել է. «Ահաբեկչության մասին տեղեկությունները այս պահին ոչ հաստատելու, ոչ հերքելու ժամանակն է»։

Նշենք, որ պայթյունը տեղի է ունեցել Հալաբյան փողոցի թիվ 11 շենքի մոտ, թիվ 63 երթուղու «Բոգդան» մակնիշի ավտոբուսում։ Պայթյունն այնքան ուժգին է  եղել, որ լսվել է մի քանի կիլոմետրից, հարեւան շենքերում ապակիներ են կոտրվել։

Ժամը 23.56-ի դրությամբ կա 7 տուժած՝ 1963 թ. ծնված Հասմիկ Սուրենի Մելքոնյան, 1979 թ. ծնված Անուշ Արշալույսի Եղիկյան, 1971 թ. ծնված Հարություն Նազարի Թերզյան, 2002 թ. ծնված Էդգար Արայիկի Գասպարյան, 2001 թ. ծնված  Անահիտ Սարգսի Միքայելյան, 2001 թ. ծնված Ռոլանդ Սուրիկի Խոջայան, 1994 թ. ծնված Արթուր Վաչիկի Մարգարյան, ով տեղափոխվել է «Ճառագայթային բժշկության եւ այրվածքների գիտական կենտրոն», որտեղ ստանալով համապատասխան բուժօգնություն՝ դուրս է գրվել:  Տուժածները ՀՀ քաղաքացիներ են:

Կա երկու զոհ, որոնց ինքնությունը չի հաղորդվում։