ԼՂՀ խնդրի կարգավորման վերաբերյալ Սերժ Սարգսյանի` «Բլումբերգին» տված հարցազրույցում ինչպես հայաստանյան հասարակության, այնպես էլ միջազգային հանրությանն ուղղված հստակ շեշտադրումներ կային: Այս մասին այսօր՝ ապրիլի 26-ին, Ազգային ժողովում լրագրողների հետ զրույցում ասաց ԱԺ Պաշտպանության, ազգային անվտանգության եւ ներքին գործերի մշտական հանձնաժողովի ղեկավար Կորյուն Նահապետյանը` պատասխանելով հարցին, թե արդյոք Սերժ Սարգսյանը բաց տեքստով խոսելով խնդրի կարգավորման երկու տարբերակի մասին, հանրությանը չէր առաջարկում պատերազմ կամ հողերը զիջելու գնով խաղաղություն:
«Հողերի հանձնման հետ կապված եկեք միանշանակ հայտարարություններ չանենք, որովհետեւ այդ մասով ՀՀ նախագահի տված պատասխանները պետք է կապել նախորդ մասում իր հնչեցրած մտքի հետ, որը վերաբերում էր Արցախի ժողովրդի ազատ կամարտահայտությանը, եւ այնտեղ որոշակի ժամկետներ էին նշվում, խնդրում եմ կոնտեքստից դուրս որեւէ միտք մի առանձնացրեք»,-ասաց Նահապետյանը: Դիտարկմանը, որ ինքնորոշման հետ կապված կոնկրետ ժամկետների մասին չխոսվեց, Նահապետյանն ասաց, որ այժմ չեն կարող բացահայտել բանակցային գործընթացի մանրամասները: «Ես չեմ էլ տիրապետում այդ մանրամասներին, կամ այստեղ շատ քիչ թվով պաշտոնյաներ են տիրապետում այդ մանրամասներին: Այն ծավալով, որ հայտնի է մեզ, պետք է ասեմ բանակցային օրակարգում ներառված են տարբեր խնդիրներ, որոնցից մեկն էլ ԼՂՀ ժողովրդի ազատ կամարտահայտության իրավունքն է եւ այդ առումով կան որոշակի գործողություններ, որոնք ենթադրվում է, որ պիտի իրականացվեն բանակցային գործընթացով: Ես որեւէ ժամկետների մասին չեմ կարող ասել: Բանակցային գործընթացը չի էլ վերսկսվել»,-նշեց ՀՀԿ-ական պատգմավորը:
Ինչ վերաբերում է հողերը զիջելու վերաբերյալ Արցախի բացասական դիրքորոշմանը, նա նշեց. «Հակասություններ պետք չէ փնտրել Հայաստանի եւ Լեռնային Ղարաբաղի Հանրապետության ղեկավարության միջեւ: Բնականաբար, խորհրդատվություներ անցկացվում են եւ մենք միշտ ասել ենք, որ ԼՂՀ իշխանությունը պետք է մասնակցի բանակցություններին եւ 1994 թվականի հրադադարի հաստատման համաձայնագրով ուղղակիորեն նախատեսված է Ղարաբաղը որպես կողմ, եւ բնական է, որ առանց ԼՂՀ ժողովրդի որոշման, չի կարող հակամարտության կարգավորման շուրջ վերջնական որոշում լինել»:
