Ռուսաստանի ԱԳ նախարար Սերգեյ Լավրովը Երեւան Ղարաբաղի հարցով առանձին փաստաթուղթ չի բերել: Այս մասին ապրիլի 27-ին Հայաստանի Ազգային ժողովում կառավարության հետ հարցուպատասխանի ժամանակ հայտարարեց ԱԳ նախարար Էդվարդ Նալբանդյանը:
Անհրաժեշտ է, որպեսզի վերացվեն Լեռնային Ղարաբաղի դեմ Ադրբեջանի լայնածավալ ագրեսիայի հետեւանքները, եւ հատկապես այդ մասին է հայտարարել Հայաստանի նախագահն իր վերջին հայտարարություններում եւ հարցազրույցներում: Եվ, իհարկե, այսօր Հայաստանի, ԵԱՀԿ Մինսկի խմբի եւ միջազգային հանրության ջանքերն ուղղված են ապրիլի սկզբին տեղի ունեցածի կրկնությունը բացառելուն: Այս մասին Երեւան այցի ժամանակ նշել է նաեւ ՌԴ ԱԳ նախարար Սերգեյ Լավրովը: Ընդամենը լուրեր են տարածվել, որ նա իր հետ փաստաթղթերի ինչ-որ փաթեթ է բերել: «Դժվար է բանակցություններ վարել մի իրավիճակում, երբ համապատասխան պայմաններ չկան»,- հայտարարեց Նալբանդյանը:
«Ադրբեջանի ցանկությունն է՝ ներկայացնել, որ Հայաստանը դուրս է գալիս բանակցային գործընթացից: Դա սուտ է: Հայաստանը երբեք դուրս չի եկել բանակցություններից եւ միշտ հանդես է եկել հակամարտությունը խաղաղ ճանապարհով լուծելու օգտին: Եթե բարձր մակարդակով ինչ-որ հանդիպումներ տեղի չեն ունեցել կամ հետաձգվել են, ապա միայն ադրբեջանական կողմի պատճառով»,- հայտարարեց նա:
«Իսկ հիմա նրանք ապարդյունք փորձեր են անում հարցականի տակ դնել հրադադարի մասին եռակողմ համաձայնագիրը: Սրան հետեւեց համանախագահների համապատասխան արձագանքը. նրանք ասացին այն, ինչ մենք ենք ասել: Հրադադարի մասին 1994 եւ 1995 թվականների եռակողմ անժամկետ պայմանագրերն ուժի մեջ են եւ դրանց դրույթներն ամբողջությամբ պետք է պահպանվեն: Պատկերը կրկին այսպիսին է. Ադրբեջանն ընդդիմանում է միջազգային հանրության կարծիքին: Դրանք նրանց կողմից բավական սխալ հաշվարկներ էին»,- ամփոփեց Հայաստանի ԱԳ նախարարը:
