Մենք պարտավոր ենք մեր սահմաններն ամուր պահելով պարտադրել խաղաղություն: Այս մասին այսօր՝ ապրիլի 29-ին, լրագրողների հետ հանդիպմանն ասաց ԱԺ ՀՀԿ խմբակցության պատգամավոր Մկրտիչ Մինասյանը:
«Ուրիշ ճանապարհ չկա, միայն պարտադրանքով է հնարավոր: Պետք է երկրում առողջ մթնոլորտ լինի, պետք է պահպանենք բանակին նեցուկ կանգնելու մթնոլորտը»,- ասաց նա:
Մկրտիչ Մինասյանի խոսքով՝ չի բացառվում է, որ պատերազմը նորից սկսվի: «Բանակցություններ հնարավոր են, իհարկե, ուշ թե շուտ դրանք լինելու են, որովհետեւ չկա մի պատերազմ, որ վերջիվերջո բանակցությունների սեղանի կողք չնստեն, իսկ թե երբ են լինելու, ապագան ցույց կտա: Պատերազմի վտանգ կա, պետք է պատրաստ լինենք»,- ասաց նա:
Մկրտիչ Մինասյանը նշեց, որ իր կարծիքով, Ռուսաստանի հետ մեր հարաբերություններն այսուհետեւ ընդլայնվելու են, համագործակցությունն ավելի արդյունավետ է դառնալու:
«Աշխարհաքաղաքական տեսակետից այս տարածքում մենք պետք է հստակ իմանանք, որ Ռուսաստանը եւ մյուս մեծ պետություններն իրենց շահերն ունեն եւ մենք որպես պետություն նույնպես մեր շահն ունենք: Մենք պետք է արժանապատիվ կեցվածք ունենանք: Շատ դժվար, դիվանագիտական եւ քաղաքական խնդիր է, կարծում եմ՝ մեր եւ դիվանագիտական կորպուսը, եւ քաղաքական ղեկավարությունը կամք, կորով ու հմտություն ունի, որ պաշտպանելով մեր շահերը, մեր գործընկերներին չվանենք մեզնից»,- ասաց նա: