Միացյալ Նահանգները կոչ է անում ղարաբաղյան հակամարտության բոլոր կողմերին խնդիրը լուծել միայն խաղաղ ճանապարհով: NEWS.am-ի հաղորդմամբ, այդ մասին հայտարարել է ԱՄՆ-ի Պետքարտուղարության փոխխոսնակ Մարք Թոները՝ պատասխանելով ադրբեջանցի լրագրողի հարցին:
Իր հարցում ադրբեջանցի լրագրողը վերջին օրերին ղարաբաղյան տարածաշրջանում տեղի ունեցածը ներկայացրեց որպես հայկական ուժերի ագրեսիա եւ ցույց տալով ինչ-որ լուսանկարներ, խնդրեց փոխխոսնակին մեկնաբանություն տալ։
Պետքարտուղարության ներկայացուցիչը, սակայն, հրաժարվեց հետեւել լրագրողի ներկայացրած պատկերին եւ հայտարարեց. «Մենք չենք ցանկանում տեսնել բռնության որեւէ աճ: Մենք քննադատում ենք կողմերի ցանկացած գրոհ եւ անհրաժեշտ ենք համարում վերադառնալ այն գործընթացին, որը կբերի Լեռնային Ղարաբաղի խնդրի խաղաղ կարգավորում: Մենք կոչ ենք անում բոլոր կողմերին վերադառնալ խաղաղ գործընթացին»: