Հայաստանի ԱԺ փոխնախագահ Հերմինե Նաղդալյանի հարցազրույցից հետո առաջացած աղմուկն արհեստական օրակարգերից մեկն է: Այս մասին, այսօր՝ մայիսի 2-ին, լրագրողների հետ զրույցում նշել է ՀՀԿ փոխնախագահ Արմեն Աշոտյանը:
«Արդյոք դուք կարծում եք, որ այս թեմայի հետագա նման քննարկումը բարձրացնում է մեր զինվորի ոգին ու հոգին: Արդյոք չի բերում նրան, որ առաջնագծում գտնվող մեր զինվորները կարող են որոշակի հոգեբանական խնդիրներ ունենալ: Ղարաբաղյան հարցը Ազգային ժողովի մանդատը չէ, այլ երկրի նախագահինն է, որն էլ հստակ ներկայացրել է ամեն ինչ: Այս հարցի իրական տերը Լեռնային Ղարաբաղի Հանրապետությունն է. Բակո Սահակյանն արդեն կարծիքը հայտնել է»,- ասաց Արմեն Աշոտյանը:
ՀՀԿ փոխնախագահը հրաժարվեց մեկնաբանել ԱԺ փոխնախագահ, ԵԽԽՎ-ում հայկական պատվիրակության ղեկավարի հարցազրույցը` նշելով, որ «անլուրջ» է այդ մասին խոսելը:
Ավելի վաղ NEWS.am-ը հայտնել էր, որ Հայաստանի ԱԺ փոխնախագահ, ԵԽԽՎ-ում հայկական պատվիրակության ղեկավար Հերմինե Նաղդալյանը ասել էր. «Երբ կընդունվի կարգավիճակի մասին որոշում եւ աշխարհը կընդունի Ղարաբաղի անկախությունը, մենք ձեր հողերը, կամ էն հողերը, որոնց վրա մենք այսօր այդ իրավունքը չունենք, մենք այդ հողերը չենք ուզում, սա մեր բուֆերային գոտին է եւ մեր անվտանգության երաշխիքն է»: Նա նաեւ նշել էր, որ «մեր փոխզիջումը ոչ թե հինգ «գրավյալ» տարածքներն են, այլ Մադրիդյան սկզբունքների ամբողջական համալիրը»: