Ղարաբաղյան հակամարտությունը պետք է լուծվի Մինսկի խմբի շրջանակներում եւ հնարավորինս բանակցությունների ճանապարհով: Այս մասին, այսօր՝ մայիսի 3-ին, լրագրողների հետ հանդիպմանն ասաց ՀՀ-ում Բրազիլիայի արտակարգ եւ լիազոր դեսպան Էդսոն Մարինյո Դուարտե Մոնտեյրոն, փոխանցում է NEWS.am-ի թղթակիցը:
Նրա խոսքով, ԼՂ հակամարտությունը նուրբ հարց է եւ այնպես չէ, որ Բրազիլիան կարող է ներառվել այդ հակամարտության լուծման մեջ:
«Վերջին շրջանում լարվածություն նկատվեց, բռնություններ տեղի ունեցան ղարաբաղա-ադրբեջանական շփման գծում, ինչն անխոս ուրախալի չէ: Բայց խնդիր է, որպեսզի ամեն ինչ լուծվի համագործակցելով, բանակցությունների ճանապարհով: Ինչպես ասել է Հայաստանի արտգործնախարարը՝ բանակցություններում ամենեւին էլ պնդումները չեն կարեւոր, որոնք պետք է հայտարարվեն, այլ գործողությունները, որոնք իրականացվում են: Իմ կարծիքով եւ Բրազիլիայի պետական դիրքորոշումն այն է, որ Մինսկի խումբն է պատասխանատու խնդրի կարգավորման համար եւ կարծում եմ, որ հենց Մինսկի խմբի շրջանակներում պետք է կոնֆլիկտը քննարկվի եւ լուծվի»,-ընդգծեց դեսպանը:
Լուսանկարը Էմմա Ասատրյանի