Գերական շահի զոհ դարձած՝ Երեւանի Եկմալյան, Արամի, Բուզանդի փողոցների, Կոնդ թաղամասի եւ «Նորաշեն 2007» ընկերությունից տուժած մի քանի տասնյակ բնակիչներ այսօր՝ մայիսի 5-ին, կառավարության շենքի դիմաց հանդիպում են պահանջում վարչապետի հետ:
Լրագրողների հետ զրույցում բողոքողները նշեցին, որ իրենցից ոմանք արդեն 12 տարուց ավելի է՝ վարձով են ապրում եւ մինչեւ հիմա չեն կարողանում ստանալ իրենց բնակարանները: Նրանք կառավարությունից պահանջում են աջակցել իրենց:
Բողոքող քաղաքացիներն արդեն մեկ ժամից ավելի է՝ կառավարության առջեւ վարչապետից պահանջում են իջնել եւ հանդիպել իրենց՝ սուլելով եւ վանկարկելով «վարչապետ, իջիր», «տվեք մեր բնակարանները», «գողեր», «թալանչիներ»:
NEWS.am-ի թղթակիցը հաղորդում է, որ բնակիչները փորձեցին անցնել փողոցը եւ իրենց բողոքի ակցիան շարունակել Հանրապետության հրապարակի գորգի վրա, սակայն ոստիկանները թույլ չտվեցին: Այնուհետեւ նրանք մի քանի րոպեով փակեցին Տիգրան Մեծի պողոտան, ոստիկանները նրանց հեռացրին փողոցից:
Կառավարության շենքի մոտ քաղաքացիներին մոտեցավ ԱԺ պատգամավոր Զարուհի Փոստանջյանը, նրանցից վերցրեց հեռախոսահամարները՝ խոստանալով հանդիպել, լսել նրանց խնդիրը, հարցը բարձրացնել Ազգային ժողովում:
