Ռազմավարական հետազոտությունների միջազգային ինստիտուտը (International Institute for Strategic Studies IISS) 2015 թվականի ընթացքում զինված հակամարտությունների մասին զեկույց է հրապարակել, որի գլուխներից մեկը նվիրված է Լեռնային Ղարաբաղի հակամարտությանը:
Հոդվածում, մասնավորապես, նշվում է, որ 2015 թվականի ընթացքում Լեռնային Ղարաբաղի հակամարտության լուծման շուրջ դիվանագիտական ջանքերը կարելի է ակտիվ բնորոշել, բայց հիմնականում անարդյունավետ՝ երկու կողմից էլ բռնության սրացման եւ ռազմատենչ հռետորաբանության ֆոնին:
Չնայած հակամարտության գոտում անվտանգության ոլորտում իրավիճակն ակնհայտորեն վատթարացել է, Հայաստանի եւ Ադրբեջանի քաղաքական դիրքորոշումները չեն փոխվել: «Երկրները կրկին միմյանց մեղադրեցին ապատեղեկատվություն տարածելու մեջ, ինչը դժվարացնում է բռնության միջադեպերի ծավալների եւ քաղաքացիական բնակչության վրա դրանց ազդեցության շուրջ կողմնակի դիտորդների վերլուծությունը»,- նշված է հոդվածում:
Ավելին, տագնապալի միտումներ ի հայտ եկան: Մասնավորապես, ըստ զեկույցի հեղինակների, հակամարտող կողմերը սկսեցին ավելի շատ ծանր զինտեխնիկա կիրառել, բացի այդ, միջադեպեր գրանցվեցին նաեւ հայ-ադրբեջանական սահմանագոտու շրջաններում:
Զեկույցի համաձայն, մարտի վերջին կողմերը հանդես եկան լայնածավալ բախումների մասին հակասական հաղորդագրություներով. Ադրբեջանի ՊՆ-ն հայտարարեց, որ մինչեւ 20 ղարաբաղյան զինվոր է սպանվել շփման գծի մերձակայքում ադրբեջանական ուժերի վրա հարձակման հետեւանքով: Մինչդեռ ԼՂՀ Պաշտպանության բանակի աղբյուրները նշեցին, որ ադրբեջանական զորքերն են հարձակում գործել իրենց դիրքերի վրա:
«Լեռնային Ղարաբաղի իշխանությունների փոխանցմամբ, արցախցի երեք զինվոր է զոհվել եւ չորսը՝ վիրավորվելս, մինչդեռ ադրբեջանական կողմից 7-14 զինվոր է սպանվել: Դրանից կարճ ժամանակ անց Ադրբեջանի պաշտպանության նախարարությունը հայտարարեց, որ հայկական կողմը ղարաբաղյան բանակի հինգ զինվորի սպանվելը թաքցրել է առանձին միջադեպերում: Ի պատասխան՝ Հայաստանի ՊՆ մամուլի քարտուղարը նշեց, որ ե՛ւ ինքը, ե՛ւ ԼՂՀ պաշտպանության բանակը թափանցիկ են աշխատում եւ հայկական լրատվամիջոցներին կոչ արեց զերծ մնալ «հակահայկական քարոզչությունը» կրկնելուց»,- ասված է զեկույցում: