Եթե Ադրբեջանը ռազմական նոր ագրեսիա սանձազերծի, դա անխուսափելիորեն կհանգեցնի Լեռնային Ղարաբաղի Հանրապետության ճանաչման հարցը երկրի օրակարգում ներառելուն: Այս մասին «Էխո Մոսկվի»-ին տված հարցազրույցում հայտարարել է ՀՀ ԱԳ փոխնախարար Շավարշ Քոչարյանը:
Նա հիշեցրել է, որ երբ Ադրբեջանն ապրիլի 2-ին Լեռնային Ղարաբաղի դեմ ագրեսիա սանձազերծեց, Հայաստանի նախագահն ասաց, որ եթե այդ ագրեսիվ գործողություները շարունակվեն, Հայաստանին ուրիշ ոչինչ չի մնա անել, քան ճանաչել ԼՂՀ-ն:
«Բայց, չնայած այս ամենին, մենք միշտ հավատարիմ ենք հակամարտությունը բացառապես խաղաղ ճանապարհով, ԵԱՀԿ Մինսկի խմբի համանախագահների միջնորդությամբ բանակցություններով լուծելուն: Ավելին, այդ բանակցությունների առարկան գաղտնազերծված է երեք նախագահների հայտարարություններով, որոնցում միանշանակ նշվում է, որ Լեռնային Ղարաբաղի ապագա կարգավիճակը որոշվում է ժողովրդի կամարտահայտությամբ եւ իրավաբանորեն պարտադիր բնույթ ունի»,- ընդգծել է Շավարշ Քոչարյանը:
Նա հավելել է, որ հայկական կողմը ելնում է հետեւյալ հանգամանքից. գոյություն ունի բանակցային ձեւաչափ, որը հիմնված է «Մադրիդյան փաստաթղթի» վրա, եւ որի էությունը հրապարակվել է համանախագահ երեք երկրների նախագահների կողմից:
«Փաստաթղթում նշվում է, թե նրանք ինչ փոխադարձ զիջումներ են առաջարկում: Մի կողմից՝ Լեռնային Ղարաբաղի վերջնական կարգավիճակը, որը վճռում է իրավաբանորեն պարտադիր հանրաքվեն: Դա նշանակում է, որ հանրաքվեի արդյունքները պետք է ճանաչեն բոլոր կողմերը, այդ թվում՝ Ադրբեջանը: Փաստաթղթում նաեւ խոսք է գնում միջանցքի մասին, որը Հայաստանը կապում է Ղարաբաղի հետ, այսինքն՝ Ղարաբաղը չի կարող անկլավ լինել: Մյուս կողմից՝ այնտեղ կան նաեւ հարցեր, որոնք հետաքրքրում են Ադրբեջանին: Դա կապված է սահմանների եւ տարածքների հստակեցման եւ բոլոր փախստականների՝ իրենց մշտական բնակության վայրեր վերադարձի իրավունքի հետ: Ահա այս փաստաթուղթն է բանակցությունների սեղանին, եւ հայկական կողմերը միշտ հավատարիմ են եղել դրան՝ ի տարբերություն Ադրբեջանի, որը չի հրաժարվում ուժային քաղաքակությունից, ինչն էլ մենք տեսանք ապրիլի 2-5-ին»,- փաստել է Շավարշ Քոչարյանը:
Հիշեցնենք, որ Հայաստանի կառավարությունը մայիսի 5-ի նիստում հավանության արժանացրեց Ազգային ժողովի երկու պատգամավորների ներկայացրած «Արցախի Հանրապետությունը ճանաչելու մասին» օրինագիծը, որտեղ նշվում է, որ «Հայաստանի Կառավարությունը ներկայացված օրինագծի հաստատումը կպայմանավորի Հայաստանի եւ Լեռնային Ղարաբաղի միջեւ քննարկումների արդյունքներով՝ հաշվի առնելով հետագա գործընթացները, այդ թվում՝ արտաքին գործոնները»: Օրինագիծն ԱԺ արտաքին հարաբերություններ մշտական հանձնաժողովում կքննարկվի ներկայացման պահից ի վեր 30 օրվա ընթացքում (ժամկետը լրանում է մայիսի 19-ին):
