Օդանավում ՀՀ նախագահ Սերժ Սարգսյանի տված մամուլի ասուլիսում մտահոգիչ կետեր կային: Այս մասին NEWS.am-ի հետ զրույցում նշել է ԼՂՀ ԱԺ պատգամավոր, «Ազգային վերածնունդ» կուսակցության նախագահ Հայկ Խանումյանը:
«Ես տեսա բացահայտ պարտվողական տրամադրություն ՀՀ նախագահի մոտ, որը եղել է նաեւ Ստեփանակերտ այցի ժամանակ: Այսօր աշխարհի տարբեր երկրներ կան, որոնք չունեն ագրեսիվ հարեւաններ, չունեն հարեւանի գոյությունը կասկածի տակ դնող հարեւաններ, բայց այնուամենայնիվ ունեն պաշտպանության համակարգեր, որովհետեւ դրա մեջ են տեսնում երկրի հարատեւության սկզբունքը: Այսօր Սերժ Սարգսյանը ունենալով հարեւան, որն անընդհատ սպառնում է պատերազմով, անընդհատ զինվում է, ագրեսիվ հայտարարություններ անում, ասում է` Հայաստանը չի կարող մշտապես պատերազմի մեջ լինել»,-ասաց Խանումյանը:
Ինչ վերաբերում է ՌԴ արտգործնախարար Սերգեյ Լավրովի` փոխզիջումների վերաբերյալ հայտարարությանը, Խանումյանն ասաց, որ Արցախի համար ազատագրված տարածքների զիջման մասին խոսք չի կարող լինել:
«Ադրբեջանի ապրիլյան զինված հարձակումը նպատակ ուներ նաեւ վերացնել 94-95 թվականի զինադադարի պայմանագրի տակ Արցախի ստորագրությունը եւ նոր համաձայնագրի հասնել, որը բարեբախտաբար չեղավ, ինչը կարելի է ասել հաջողություն է: Մշտադիտարկումն ընդամենը զրույց էր, որը ժամեր անց Ադրբեջանի տարբեր հարթակներում հերքվեց: Ես կարծում եմ` վերջին տարիներին տարբեր համաձայնությունների մասին ենք լսել, սակայն երբ Ալիեւի օդանավը Բաքու է հասնում, համաձայնություններն ի չիք են դառնում: Ես գրեթե վստահ եմ, որ Ադրբեջանը չի համաձայնի համապատասխան սարքեր տեղադրել սահմանին, ավելին, կարծում եմ` սարքերի տեղադրումը ոչինչ չի փոխելու»,-ասաց Խանումյանը:
Հիշեցնենք, որ Վիեննայում մայիսի 16-ին ՀՀ նախագահ Սերժ Սարգսյանը եւ Ադրբեջանի նախագահ Իլհամ Ալիեւը մասնակցել են ԵԱՀԿ Մինսկի խմբի համանախագահող երկրների արտաքին գործերի նախարարների նախաձեռնությամբ եւ մասնակցությամբ տեղի ունեցած քննարկմանը: Նախագահները վերահաստատել են հրադադարին եւ հակամարտության խաղաղ կարգավորմանն իրենց հանձնառությունը: Հետագա բռնությունների վտանգը նվազեցնելու համար նրանք համաձայնել են ամենակարճ ժամկետներում ավարտին հասցնել ԵԱՀԿ-ի հետաքննական մեխանիզմների ներդրման աշխատանքները: