ՀՀ վարչապետն անձամբ է օգնել 2 վիրավոր զինծառայողների ընտանիքներին, որոնց հարազատները արտասահմանում բուժում էին պահանջում։ Այս մասին մայիսի 18-ին խորհրդարանում ասել է վարչապետ Հովիկ Աբրահամյանը։
«Եղել են դեպքեր, երբ Առողջապահության նախարարության ներկայացուցիչներն ասել են, որ արտասահման ուղարկելը ոչինչ չի տա։ Բայց ես հասկանում եմ հարազատների մտահոգությունը։ Եվ երկու դեպքում ես անձամբ օգնել եմ այդ ընտանիքներին»,- ասել է Աբրահամյանը։
«Մենք բարոյական պատասխանատվություն ենք կրում, եւ պետք չէ բոլոր հարցերը դիտարկել միայն օրենքի հարթության մեջ։ Մենք նաեւ բարոյական պարտք ունենք։ Այդ մարդիկ իրենց կյանքը վտանգի են ենթարկել՝ պաշտպանելով հայկական պետության սահմանը։ Եթե անգամ օրենքը օգնելու հնարավորություն չի տալիս, ես պատրաստ եմ օգնել նման դեպքերում»,- ասել է վարչապետը։
