ԱՄՆ Ներկայացուցիչների պալատի անդամ Բրեդ Շերմանը մայիսի 18-ին կոչ է արել Պետդեպարտամենտին հետաքննել Ադրբեջանի պատերազմական հանցագործությունները ՝ Լեռնային Ղարաբաղի դեմ ապրիլի 2-7-ը սանձազերծած հարձակումների ժամանակ ու պահանջել է անմիջապես դադարեցնել Բաքվին ռազմական օգնության տրամադրումը, հիշեցնելով Ալիեւի ռեժիմի շարունակական հարձակումները Հայաստանի ու Արցախի վրա, հայտնում է Ամերիկայի Հայ դատի հանձնախումբը:
«Մենք սատարում ենք կոնգրեսական Շերմանին, որը կոչ է անում «Լիհիի օրենքի» շրջանակում հետաքննել Ադրբեջանի գործած վարյարգությունները»,- ասել է Ամերիկայի Հայ դատի հանձնախմբի գործադիր տնօրեն Արամ Համբարյանը: «Պետդեպարտամենտի առաջնորդները դեմ կգնան իրենց հանձնառություններին, եթե չհետեւեն Լիհիի օրենքի տառին ու ոգուն, օրենք, որը կոչված է պաշտպանելու ոչ միայն միջազգային վայրագություններն ու ռազմական հանացագործությունները, այլեւ մեզ ՝ ամերիկացիներիս, որպեսզի հարկերի ձեւով վճարած մեր գումաները օտար երկրների զինված ուժերը չօգտագործեն մարդկության դեմ գազանությունների համար»:
Կոնգրեսական Շերմանը մայիսի 18-ին Պետքարտուղար Ջոն Քերիին ուղղած իր նամակում պահանջել է, որ պետդեպարտամենտը արագ ու հանգամանալից հետաքննի ապրիլի 2-7 ժամանակահատվածում Լեռնային Ղարաբաղի դեմ մարտական գործողությունների ժամանակ Ադրբեջանի զինված ուժերի կատարած վայրագություններն ու մարդու իրավունքների դեմ հանցագործությունները:
Նա պահանջել է անմիջապես դադարեցնել Ադրբեջանին տրամադրվող ռազմական աջակցությունը ՝ հաշվի առնելով, որ Ալիեւի կառավարությունը շարունակում է հարձակումները Լեռնային Ղարաբաղի ու Հայաստանի վրա, պարբերաբար սպառնում է վերսկսել լայնածավալ գործողություններ ու մերժում է ԱՄՆ-ի ու միջազգային համայնքի կոչերը ՝ անհապաղ դուրս բերել դիպուկահարներին:
«Ադրբեջանը ամերիկյան ռազմական աջակցության ո՛չ կարիքն ունի, ոչ էլ արժանի է դրան»,-ասել է կոնգրեսականը: Նա իր նամակում նշել է ապրիլյան պատերազմի օրերին ադրբեջանական զինված ուժերի վայրագությունները թե հայ զինծառայողների թե խաղաղ բնակիչների նկատմամբ: Նա հիշեցրել է երեք հայ զինվորների գլխատումները, Թալիշ գյուղի տարեց բնակիչների նկատմամբ վայրագությունները եւ շեշտել, որ Ամերիկայի Հայ դատի հանձնախումբը այդ բոլոր փաստերը ներկայացրել է ԱՄՆ –ի ու Եվրոպայի պաշտոնյաներին:
Նամակում կոնգրեսականը անդրադարձել է նաեւ Կովկասյան վերլուծաբան Էմիլ Սանամյանի մտահոգություններին, որ ապրիլյան գործողություններին մասնակցած ադրբեջանական զինվորականների շարքերում եղել են այնպիսիք, որոնք մասնակցել են ԱՄՆ կազմակերպած ռազմական դասընթացներին: Ադրբեջանի հատուկ ուժերի բրիգադային հրամանատար Վուգար Յուսիֆովն օրինակ 2007-ին ռազմական նախապատրաստում է ստացել Արիզոնայում ՝ Պենտագոնի կազմակերպած ծրագրի շրջանակում, իսկ լետենյանտ Մուրադ Միրզեեւը 2006-ին է մասնակցել է ԱՄՆ ռազմական նավատորմի սպաների դասընթացներին: Թե Յուսուֆովը, թե Միրզեեւը սպանվել են ապրիլյան պատերազմի օրերին,կան տվյալներ, որ նրանք մասնակցել են Թալիշի դիվերսիոն ներխուժմանը,որտեղ էլ հենց գրանցվել են վայրագություններ խաղաղ բնակիչների նկատմամբ:
«Քանի որ Ադրբեջանը օտար երկրներից ստանում է ռազմական աջակցություն, նաեւ մասնակցում միջազգային ռազմական նախապատրաստման դասընթացների՝ նա պետք է հաշվետու լինի, ըստ ամերիկյան «Լիհիի օրենքների», որոնք տարածվում են բոլոր այն դեպքերի վրա, երբ ԱՄՆ կողմից ֆինաանսավորվող օտար երկրները ռազմական հանցագործություններ են կատարում: Վերոնշյալ փաստերի ապացուցման դեպքում ԱՄՆ –ն պետք է անհապաղ դադարեցնի ռազմական աջակցությունը ու մյուս երկրների հետ միասին հետամուտ լինի, որ հանցագործները պատասխան տան արդարադատության առջեւ», գրել է կոնգրեսականը պետքարտուղար Ջոն Քերիին ուղղված նամակում: