Վիեննայում ոչ միայն Հայաստանի ու Ադրբեջանի նախագահների հանդիպումը կայացավ, այլեւ որոշակի արդյունքներ ձեռք բերվեցին: Այս մասին մայիսի 20-ին լրագրողների հետ զրույցում ասել է Հայաստանում Գերմանիայի արտակարգ ու լիազոր դեսպան Մաթիաս Քիսլերը՝ Երեւանում անցնող «Տնտեսական հնարավորությունների շաբաթ» բիզնես ֆորումի ու «Սիրիահայերի համար նոր հեռանկարներ» ցուցահանդեսի շրջանակում:
Դեսպանի խոսքով, երկու երկրների հանդիպումը Վիեննայում կարելի է մեծ հաջողություն համարել: «Դա տեղի է ունեցել ԵԱՀԿ Մինսկի խմբի համանախագահող երկրների ջանքերի ու երեք արտգործնախարարների քաղաքական մեծ աջակցության շնորհիվ»,- նշել է Քիսլերը: Հանդիպման արդյունքներից դիվանագետը առանձնացրեց այն, որ ձեռք է բերվել պայմանավորվածություն 1994-ի հրադադարի մասին Համաձայնագրի պահպանման անհրաժեշտության մասին: Դիվանագետը կարեւոր համարեց նաեւ շփման գծում մոնիտորինգի մեխանիզմների ներդրման ու ԵԱՀԿ գործող նախագահի անձնական ներկայացուցի՝ Անջեյ Կասպրշիկի աշխատակազմի ընդլայնման մասին ձեռք բերված պայմանավորվածությունները: «Սրանք այն կետերն են, հանուն որոնց ԵԱՀԿ-ում Գերմանիայի նախագահությունը նաեւ իր կողմից է ջանքեր գործադրել ու արել հնարավոր ամեն ինչ, որպեսզի դրանք իրականանան»,- հավելել է Մաթիաս Քիսլերը:
Պատասխանելով այն հարցին, որ Ադրբեջանում արդեն հայտնել են դեսպան Կասպրշիկի լիազորությունների ընդլայնման հետ իրենց անհամաձայնության մասին, դեսպանը նշեց «Գոյություն ունի համանախագահողների հայտարարություն, որտեղ ամրագրված է,ո ր երկու կողմերը համաձայնել են ընդլայնել այդ աշխատակազմը: Եվ ես այն համգամանքով եմ առաջնորդվում, որ երկու կողմերն էլ պետք է հավատարիմ մնան այդ պայմանավորվածության կատարմանը»:
Հիշեցնենք, որ մայիսի 16-ին Վիեննայում կայացել է Հայաստանի ու Ադրբեջանի նախագահներ Սերժ Սարգսյանի ու Իլհամ Ալիեւի հանդիպումը՝ Ռուսաստանի արտգործնախարար Սերգեյ Լավրովի, Ֆրանսիայի եվրոպական հարցերով պետքարտուղար Արլեմ Դեզիրի ու ԱՄՆ պետքարտուղար Ջոն Քերիի մասնակցությամբ: Հանդիպմանը ներկա էին նաեւ ԵԱՀԿ ՄԻնսկի խմբի համանախագահներ Իգոր Պոպովը, Պյեր Անդրիեն ու Ջեյմս Ուորլիքը: