Ռուսաստանի արտգործնախարարը զարմանք է հայտնել Յենս Սթոլթենբերգի հայտարարության կապակցությամբ այն մասին, որ Դաշինքը որոշել է Ռուսաստան-ՆԱՏՕ խորհրդի նիստն անցկացնել մինչեւ հուլիս:
Սերգեյ Լավրովը ՆԱՏՕ-ի գլխավոր քարտուղարին հիշեցրել է, որ Խորհուրդը գործում է փոխհամաձայնության հիման վրա, հայտնում է «Ինտերֆաքսը»: «Ինչո՞ւ է նա նման բան ասել: Ռուսաստան-ՆԱՏՕ խորհուրդը գործում է փոխհամաձայնության հիման վրա: Եթե նրանք ուզում են քննարկել դա, թող քննարկեն մեզ հետ, ոչ թե բարձրանա խոսափողի վրա»:
Ավելի վաղ Սթոլթենբերգը հայտնել էր, որ ՆԱՏՕ-ի երկրների արտգործնախարարները որոշել են Ռուսաստան-ՆԱՏՕ խորհրդի եւս մեկ նիստ անցկացնել դեսպանների մակարդակում մինչեւ Դաշինքի գագաթնաժողովը, որը տեղի կունենա Վարշավայում հուլիսի սկզբին:
ՆՏՎ-ն հիշեցնում է, որ ապրիլի 20-ին Բրյուսելում տեղի է ունեցել Ռուսաստան-ՆԱՏՕ խորհրդի վերջին երկու տարվա ընթացքում առաջին նիստը: Այդ ժամանակ Սթոլթենբերգը հայտնել էր կողմերի միջեւ խորը տարաձայնությունների մասին: