Լեռնային Ղարաբաղի Հանրապետությունը պետք է վերադառնա բանակցային սեղանի շուրջ: Այս մասին NEWS.am-ի հետ զրույցում նշել է Եվրախորհրդարանի պատգամավոր Ֆրանկ Էնգելը:
Նրա համոզմամբ, առանց Ղարաբաղի այդ բանակցությունները ոչ մի իմաստ չունեն: «ԼՂՀ-ն վերահսկում է իր տարածքը եւ զինված ուժերը: ԼՂՀ բնակիչները բազմիցս հանրաքվեի օգնությամբ արտահայտել են իրենց ցանկությունը, որ ուզում են լինել անկախ պետություն»,-ընդգծել է Ֆրանկ Էնգելը:
ԼՂՀ-ն, ըստ Էնգելի, կայացած պետություն է՝ սեփական ժողովրդավարական ինստիտուտներով եւ օրենքի գերիշխանության հարգմամբ: «Բանակցությունները պետք է տեղի ունենան հենց այդ ինստիտուտների հետ»,-ընդգծել է նա:
Հիշեցնենք, որ ԵԱՀԿ Մինսկի խմբի ռուս համանախագահ Իգոր Պոպովը NEWS.am-ին հայտնել էր, որ Լեռնային Ղարաբաղը պետք է վերադառնա բանակցությունների սեղանի շուրջ: «Իրոք, այս փուլում ղարաբաղցիները բանակցություններին ձեւականորեն չեն մասնակցում: Սակայն այդ թեմային մեծ ուշադրություն է հատկացվում համանախագահների հանդիպման ընթացքում եւ Հայաստանում, եւ Ադրբեջանում, եւ հենց Լեռնային Ղարաբաղում: Ենթադրում եմ, թե որոշակի փուլում, օրինակ` շրջանակային համաձայնության ձեռք բերումից հետո ղարաբաղցիները պետք է վերադառնան բանակցությունների սեղանի մոտ: Չէ որ խոսքն այն մարդկանց մասին է, որոնք պետք է ապրեն այնտեղ», - հայտնել էր Իգոր Պոպովը:
