ԻՊ ահաբեկչական խմբավորման գրոհայինները մահապատժի են ենթարկել իրենց ութ կողմնակցի, որոնք փախել էին արեւմտյան Անբար նահանգում գտնվող Էր-Ռուտբա իրաքյան քաղաքից, Sputnik գործակալությանը հայտնել է Մոսուլում իրազեկված աղբյուրը, հայտնում է «ՌԻԱ Նովոստին»:
Աղբյուրը հայտնել է, որ ԻՊ-ի գրոհայիններն իրենց ութ կողմնակցի են գլխատել, որոնք փախել էին Էր-Ռուտբա քաղաքում անվտանգության իրաքյան ուժերի հետ դիմակայությունից, երբ այսպես կոչված «ԻՊ-ի շարիաթական դատարանը» որոշել էր նրանց մահապատժի ենթարկել Մոսուլից 50 կմ հեռու գտնվող Թալլ-Աֆար քաղաքի հրուշակագործական վառարանում ողջ-ողջ այրելով: Աղբյուրը հավելել է, որ մահապատիժն իրականացվել է քաղաքի բնակիչների եւ ԻՊ-ի գրոհայինների աչքի առաջ:
Անցյալ շաբաթ Իրաքի բանակը հայտնել է Էր-Ռուտբան ԻՊ-ի գրոհայիններից ամբողջությամբ ազատելու մասին: Քաղաքը խմբավորման կողմից գրավվել էր 2014-ին:
ԻՊ-ն այսօրվա դրությամբ համաշխարհային անվտանգության գլխավոր սպառնալիքներից մեկն է: Երեք տարում ահաբեկիչներին հաջողվել է զգալի տարածքներ գրավել Իրաքում եւ Սիրիայում, որոնց մի մասը հաջողվել է հետ գրավել վերջին ամիսներին: ԻՊ-ի դեմ պայքարի միասնական ճակատ չկա. խմբավորման դեմ պայքարում են Սիրիայի կառավարական ուժերը, որոնց աջակցում է ՌԴ ՌՕՈՒ-ն, Իրաքի բանակը, ԱՄՆ-ի գլխավորած միջազգային կոալիցիան, ինչպես նաեւ քրդերը, լիբանանյան եւ իրաքյան շիա կամավորականները: