Արցախի Մարտակերտի շրջանի Մատաղիս գյուղում մայիսի 23-ից սկսվել են հակառակորդի արկակոծման հետեւանքով վնասված տների վերանորոգման աշխատանքները: Այս մասին NEWS.am-ի թղթակցին ասաց Մարտակերտի վարչակազմի ղեկավար Վլադիկ Խաչատրյանը:
Մատաղիսում արդեն երկրորդ անգամ են կատարվում վերանորոգման աշխատանքներ: Քառօրյա պատերազմից հետո պատասխանատուները փոխել էին ապակիները, սակայն ապրիլի վերջին նորից ադրբեջանական կողմը կրակել էր գյուղի վրա` պատճառելով նյութական վնաս, ստիպված դադարեցրել էին աշխատանքները:
«Մայիսի 23-ին չափագրումներ ենք արել եւ սկսել վերանորոգման աշխատանքները»,- ասաց Վլադիկ Խաչատրյանը:
Նա հայտնեց, որ մատաղիսցիներն արդեն վերադարձել են գյուղ եւ ապրում են իրենց բնականոն կյանքով:
Հիշեցնենք, որ Մատաղիսն առաջին անգամ հակառակորդը արկակոծել է ապրիլի 2-ին՝ առավոտյան 06:30-ի սահմաններում: Արկերից երկուսն ընկել էր տների վրա, երկուսն էլ` հիդրոէլեկտրակայանում: