Թուրքիայի նոր վարչապետ Բինալի Յըլդըրըմը կկատարի միայն այն, ինչ իրեն կհրահանգի նախագահ Էրդողանը: NEWS.am-ի թղթակցի հետ զրույցում այս մասին հայտարարեց Ռուսաստանի գիտությունների ակադեմիայի Համաշխարհային տնտեսության եւ միջազգային հարաբերությունների ինստիտուտի գիտաշխատող, քաղաքագետ, թուրքագետ Վիկտոր Նադեին-Ռաեւսկին:
Փորձագետը Թուրքիայում գործադիր իշխանության ղեկավարի փոփոխությունից առանձնահատուկ ակնկալիքներ չունի: «Չնայած Սահմանադրությամբ վարչապետը շատ ավելի մեծ լիազորություններ ունի, քան նախագահը, իրավիճակն այնպիսին է, որ նախագահն արդեն հակասահմանադրական մեթոդներով իրեն է հարմարեցնում գրեթե ամբողջ իշխանությունը: Այդ պատճառով էլ նշանակվեց նոր վարչապետը: Դժվար թե կարելի է լուրջ քայլեր ակնկալել, որոնք կարող են հանգեցնել արտաքին քաղաքականության մեջ փոփոխությունների. արտաքին քաղաքականությունն այժմ Էրդողանն է համակարգում»,- ընդգծեց Վիկտոր Նադեին-Ռաեւսկին:
Ըստ նրա, ամենայն հավանականությամբ, նոր վարչապետը սեփական որոշումները չի կայացնի որպես քաղաքական գործիչ: «Նա կփորձի Ռուսաստանի հետ հարաբերությունների վատթարացումը վերագրել Դավութօղլուին, մասնավորապես, որ հենց նա է հրահանգել Սիրիայում խոցել ռուսական օդանավը, առավել եւս, որ Դավութօղլուն այդ մասին պաշտոնապես հայտարարել է: Բայց զորքերի գլխավոր հրամանատարը, իհարկե, ոչ թե վարչապետն է, այլ նախագահը: Այդ պատճառով դա Էրդողանին պաշտպանելու փորձ էր»,- հիշեցրեց Նադեին-Ռաեւսկին:
Չնայած ժամանակին Թուրքիայի այժմյան վարչապետը հանդես է եկել Ռուսաստանի հետ հարաբերությունների բարելավման օգտին, սակայն, ըստ թուրքագետի, նա անկախ գործիչ չէ:
Հիշեցնենք, որ Թուրքիայի իշխող Արդարություն եւ զարգացում կուսակցության՝ մայիսի 22-ին անցկացված արտահերթ համագումարում կուսակցության ղեկավար ընտրվեց տրանսպորտի եւ կապի նախկին նախարար Բինալի Յըլդըրըմը: Նախագահ Էրդողանը նրան հանձնարարեց ստանձնել երկրի վարչապետի պաշտոնն ու նոր կառավարություն ձեւավորել:
