ՌԴ Պաշտպանության նախարարությունը հետաձգում է Սիրիայում գրոհայինների դիրքերին հարվածներ հասցնելը մինչեւ ավարտվի մի շարք զինված խմբավորումների տարանջատումը «Ջաբհաթ ան-Նուսրա» խմբավորումից: Այդ մասին լրագրողներին հայտնել է ռազմական գերատեսչության պաշտոնական ներկայացուցիչ Իգոր Կոնաշենկովը, հայտնում է ՏԱՍՍ-ը:
Նրա խոսքով, վերջին մի քանի օրվա ընթացքում Սիրիայում հաշտեցման ռուսաստանյան կենտրոն մոտ տասնյակ դիմում է ստացվել տարբեր նահանգներում, նախ եւ առաջ Հալեպում եւ Դամասկոսում ռազմական խմբավորումներից, խնդրելով հարվածներ չհասցնել մինչեւ տարանջատման ավարտը:
«Ավելին, նրանցից որոշները պատրաստ են ներկայացնել իրենց վերահսկողության տակ գտնվող շրջանների կոորդինատները եւ սահմանները ահաբեկիչներին այնտեղից ամբողջությամբ քշելուց եւ սիրիական բնակավայրերի տվյալ տարածքներից եւ կառավարական զորքերի դիրքերից սադրիչ գնդակոծությունների հետագա բացառումից հետո: Հաշվի առնելով դա` որոշում է կայացվել երկարաձգել առանձին ռազմական կազմավորումների հետ աշխատանքի ժամկետը` նրանց հրադադարի ռեժիմում ներգրավելու, ահաբեկիչներից տարանջատման եւ նրանց վերահսկողության տակ գտնվող շրջանների հստակեցման նպատակով, մինչեւ կսկսեն հարվածներ հասցնել գրոհայինների դիրքերին», - ասել է Կոնաշենկովը:
Ավելի վաղ ՌԴ պաշտպանության նախարար Սերգեյ Շոյգուն ամերիկացի գործընկերներին եւ միջազգային կոալիցիային առաջարկել էր մայիսի 25-ից համատեղ ավիահարվածներ հասցնել Սիրիայում ահաբեկիչների ուղղությամբ: Միաժամանակ նա նշել էր, որ Ռուսաստանն իրեն իրավունք է վերապահում մայիսի 25-ից սկսել միակողմանի կարգով հարվածներ հասցնել գրոհայինների ուղղությամբ, որոնք չեն միացել Սիրիայում հրադադարին:
Սիրիայում փետրվարի 27-ից գործում է հրադադարի ռեժիմը: Այն չի տարածվում ԻՊ եւ «Ջաբհաթ ան-Նուսրա» ահաբեկչական խմբավորումների, ինչպես նաեւ այլ խմբավորումների վրա, որոնք ահաբեկչական են ճանաչվել ՄԱԿ-ի Անվտանգության Խորհրդի կողմից:
