Լեռնային Ղարաբաղի հարցը պետք է քննարկել ԵԱՀԿ ՄԽ շրջանակներում եւ բանակցությունների միջոցով հասնել խաղաղ կարգավորման: Այս մասին մայիսի 26-ին՝ ԵՊՀ-ում «Պարսկական գրականություն եւ պատմություն» թեմայով գիտաժողովի ժամանակ, ասել է Հայաստանում Իրանի Իսլամական Հանրապետության դեսպան Սեյեդ Քազեմ Սաջադին:
Դեսպանի խոսքով՝ Իրանը միշտ փորձել է կանխել հայկական եւ ադրբեջանական կողմերի միջեւ ռազմական գործողությունները: Ի պատասխան NEWS.am-ի հարցին, թե Ադրբեջանի ապակառուցողական քայլերը չեն խոչընդոտում արդյոք տարածաշրջանում խաղաղության հաստատմանը, դեսպանն ասաց. «Այդ հարցը պետք է քննարկել ԵԱՀԿ ՄԽ շրջանակներում եւ բանակցությունների միջոցով հասնել խաղաղ կարգավորման»:
Անդրադառնալով հակամարտության գոտում խաղաղապահ ուժեր տեղակայելուն՝ դեսպանը նշեց, որ Իրանը միշտ փորձել է կողմերին զսպվածության կոչեր անել: «Եվ այդ հարցը կախված է երկու երկրների բարձրաստիճան անձանց որոշումներից»,- հավելել է նա: