Սարսանգի ջրամբարի մասին ԵԽԽՎ բանաձեւը չէր կարող իրավական հետեւանքներ ունենալ: Այս մասին մայիսի 26-ին՝ խորհրդարանում 2015-ի բյուջեի կատարողականի հաշվետվության ժամանակ, ասել է ՀՀ արտգործնախարար Էդվարդ Նալբանդյանը՝ պատասխանելով Նիկոլ Փաշինյանի հարցին:
Նալբանդյանի խոսքով՝ այդ բանաձեւը չէր կարող իրավական հետեւանքներ ունենալ, քանի որ հայտնի է, թե ինչ ձեւաչափով է այն ընդունվել: «Դուք՝ որպես պատգամավոր, գիտեք, որ խորհրդարանական վեհաժողովում ընդունված փաստաթղթերը ոչ մի նշանակություն չունեն բանակցող կողմերի համար, եւ այդ բանաձեւը երբեք չի բարձրացվել բանակցությունների ժամանակ ոչ մեկի կողմից: Ավելին՝ տխրահռչակ բանաձեւի ընդունումից մի քանի օր առաջ համանախագահները հայտարարել էին, որ դա միայն խանգարում է բանակցային գործընթացին եւ պետք չէ զբաղվել նման անիմաստ գործողություններով», - ասել է Նալբանդյանը: