Ամենայն հավանականությամբ ՆԱՏՕ-ի գումարտակային մարտավարական խումբ կտեղակայվի Բալթյան երկրներից յուրաքանչյուրում: Ուրբաթ նման կարծիք է հայտնել Լատվիայի նախագահ Ռայմոնդս Վեյոնիսը, հայտնում է ՏԱՍՍ-ը:
«Այդ հարցով բանակցությունները շարունակվում են: Դրա վրա աշխատում են ՆԱՏՕ-ի անդամ երկրների նախարարները: Կարծում եմ, որոշումը դրական կլինի», - ասել է նա Լատվիայի հեռուստատեսությանը տված հարցազրույցում:
Գերմանիայի արտգործնախարար Ֆրանկ Վալտեր Շթայնմայերի հետ ուրբաթ Ռիգայում կայացած բանակցությունների ընթացքում Լատվիայի նախագահը նաեւ ընդգծել է, որ ակնկալում է տարածաշրջանում ՆԱՏՕ-ի երկարաժամկետ ռազմական ներկայության հարցի լուծում: «ՆԱՏՕ-ի հուլիսյան գագաթնաժողովից հետո մենք դաշնակիցներից երկարաժամկետ ռազմական ներկայություն ենք ակնկալում տարածաշրջանում, որը պաշտպանություն կապահովեր ամեն տեսակ սպառնալիքներից», - հայտնել է Վեյոնիսը:
Այս օրերին Բալթիայի երկրներում շրջագայություն կատարող Ֆրանկ Վալտեր Շտայնմայերը նախօրեին չէր պատասխանել, թե Բեռլինն ինչ չափով կմասնակցի Բալթիայի երկրների անվտանգության ամրապնդմանը:
«Վերջնական որոշում չի ընդունվել»,-ասել է նա հինգշաբթի Լատվիայի արտգործնախարար Էդգար Ռինկեւիչի հետ բանակցությունների արդյունքներն ամփոփող մամուլի ասուլիսին
Միաժամանակ Շտայնմայերն ընդգծել է ՆԱՏՕ-ի եւ ՌԴ-ի միջեւ փոխադարձ վստահության մթնոլորտի վերականգնման կարեւորությունը: «Մեզ համար անհրաժեշտ է նվազեցնել լարվածությունը եւ վերականգնել ՆԱՏՕ-ի եւ Ռուսաստանի միջեւ վստահության մթնոլորտը», - ասել է նա: