Հայաստանում շաքարային մենաշնորհ չկա, ուղղակի ոչ ոք չի ցանկանում մրցակցել խոշորագույն ներմուծողի հետ: Այդ մասին մայիսի 30-ին խորհրդարանում հայտնել է Հայաստանի Պետեկամուտների կոմիտեի փոխնախագահ Արմեն Ալավերդյանը:
Նրա խոսքով, սկզբում անհրաժեշտ է նշել, որ բացի տիրապետող «Ալեքս Գրիգ» ընկերությունից, կան նաեւ այլ ներմուծողներ: Դրանք հրուշակեղենի, զովացուցիչ ըմպելիքների եւ այլնի արտադրողներ են, որոնք իրենք են իրենց համար շաքար ներմուծում: Այժմ նման ընկերությունների թիվը 18 է: Սկզբունքորեն շաքար կարող է ներմուծել ցանկացած գործարար: Ուղղակի խոշոր ներմուծողները, որոնք ձեւավորվել են 90-ականներին, կապիտալի առաջնային կուտակման ժամանակաշրջանում, արդեն կարողացել են երկրի ներսում վաճառքի ցանց ստեղծել, իսկ արտասահմանում` առեւտրական կապեր, ինչի շնորհիվ կարող են ավելի շահավետ պայմաններ ստանալ: «Այժմ ես խոսում եմ ոչ թե կոնկրետ մարդկանց եւ ընկերությունների մասին, այլ երեւույթների` ընդհանրապես: Նման բան է տեղի ունենում մի շարք շուկաներում, լինի դա շաքարինը, ալյուրինը, ձիթապտղի յուղինը, բրնձինը կամ էլ ուրիշ ինչ-որ բանինը: Առայժմ չկան ֆինանսական խոշոր ընկերություններ, որոնք ցանկանային զրոյից մրցակցության մեջ մտնել: Բայց կարծում եմ, որ ժամանակի ընթացքում այդ հարցը հենց այդպես էլ կլուծվի», - նշել է Ալավերդյանը:
Հիշեցնենք, որ «Ալեքս Գրիգը» պատկանում է ՀՀԿ-ական պատգամավոր, օլիգարխ Սամվել Ալեքսանյանին:
