Դերասան եւ ռեժիսոր Մել Գիբսոնն աշխատում է «Քրիստոսի չարչարանքները» ֆիլմի շարունակության վրա, հայտնում է Gazeta-ն` վկայակոչելով The Hollywood Reporter-ին:
Հաղորդագրության մեջ ասվում է, որ ֆիլմի սցենարը, որում, ինչպես նշվում է, շեշտը կդրվի Հիսուսի հարության վրա, գրում է Ռենդալլ Ուոլլեսը:
Իր` Ուոլլեսի խոսքով, տվյալ նախագիծն իրականացման առումով շատ բարդ է, այդ պատճառով դժվար է այն գաղտնի պահելը:
«Ես միշտ ցանկացել եմ պատմել այդ պատմությունը: «Քրիստոսի չարչարանքները» ֆիլմն ընդամենը սկիզբն է, այդ թեմայով դեռ շատ պատմություններ կան», — ասել է Ուոլլեսը:
Միաժամանակ Գիբսոնի պաշտոնական ներկայացուցիչը հրաժարվել է մեկնաբանել դերասանի` տվյալ նախագծին մասնակցության հնարավորությունը:
«Քրիստոսի չարչարանքները» ֆիլմը, որը թողարկվել է 2004-ին, համաշխարհային վարձույթում ավելի քան 600 մլն դոլար է հավաքել: Միաժամանակ դրա արտադրության վրա ընդամենը 30 մլն դոլար է ծախսվել:
