Օռլանդոյի գիշերային ակումբում հրաձգություն կազմակերպած Օմար Մաթինի նախկին կինը հայտարարել է, որ նա ցանկանում էր ոստիկան դառնալ։ Կնոջ հարցազրույցը հրապարակել է CNN–ը։
«Նա ցանկանում էր ոստիկան դառնալ, աշխատում էր ուղղիչ հաստատությունում»,– ասել է Սիտորա Յուսուֆին։ Նրա խոսքով՝ Մաթինը իրենց համատեղ կյանքի ընթացքում օրինական զենք է ունեցել։
«Նա երկբեւեռ խանգարում ուներ»,– ասել է կինը՝ հավելելով, որ իր նախկին ամուսինը հոգեպես անհավասարակշիռ մարդ էր։ Կնոջ խոսքով՝ իրենք միասին ապրել են ընդամենը 4 ամիս։ «Վերջին 7-8 տարում մենք ոչ մի շփում չենք ունեցել»,– պատմել է կինը։
Հիշեցնենք, որ ԱՄՆ պատմության մեջ ամենազանգվածային հրաձգության ժամանակ, որը տեղի է ունեցել շաբաթ գիշերը Օռլանդո քաղաքի գեյ- ակումբում, 50 մարդ է զոհվել ու 53-ն էլ վիրավորվել են։ Կասկածյալ Օմար Մաթինը, ՀԴԲ տեղեկություններով, զանգահարել էր շտապ օգնության հեռախոսահամարով ու հայտնել, որ ինքը ԻՊ գաղափարակիր է: ԱՄՆ նախագահ Բարաք Օբաման կատարվածը ահաբեկչություն է անվանել: