Այն փաստը, որ Հայաստանի եւ Ադրբեջանի նախագահները հանդիպում են, եւ տեղի է ունենում վստահության միջոցների հաստատմանն ուղղված զրույց, արդեն լավ նշան է։ Այս մասին հունիսի 21-ին՝ մամուլի ասուլիսի ժամանակ, ասել է Հայաստանում Ֆրանսիայի արտակարգ եւ լիազոր դեսպան Ժան Ֆրանսուա Շարպանտիեն՝ անդրադառնալով հունիսի 20-ին Սանկտ Պետերբուրգում Ռուսաստանի, Հայաստանի եւ Ադրբեջանի նախագահների հանդիպմանը։
Նա հիշեցրեց, որ մեկ ամսում Հայաստանի եւ Ադրբեջանի նախագահների միջեւ արդեն 2 հանդիպում է կայացել։ Առաջին հանդիպումը նախաձեռնել էր ամերիկյան դիվանագիտությունը։ Երկրորդը ռուսական կողմի նախաձեռնությունն էր։ «Չխորանալով թեմատիկայի մեջ՝ կարող եմ ասել, որ այն փաստը, որ Հայաստանի եւ Ադրբեջանի նախագահները հանդիպում են, եւ տեղի է ունենում վստահության միջոցների հաստատմանն ուղղված զրույց, արդեն լավ նշան է։ Քանի որ առանց երկխոսության չի կարող լինել քաղաքական լուծում»,– ասել է դեսպանը։
Դեսպանը նշել է, որ Սանկտ Պետերբուրգի հանդիպման արդյունքում արված հայտարարության մեջ շատ կարեւոր գաղափար կա՝ պարբերաբար հանդիպումներ անցկացնել։ «Քանի որ առանց երկխոսության չի կարող լինել փոխադարձ ճանաչման գործընթաց, որի նպատակը մյուս կողմի դիրքորոշումը հասկանալն ու պատկերացնելն է»,– նշել է Ժան Ֆրանսուա Շարպանտիեն՝ եւս մեկ անգամ ընդգծելով, որ Ֆրանսիան պատրաստ է աջակցել բանակցային գործընթացին։
