Ֆրանսիան, բնականաբար, համագործակցում է Լեռնային Ղարաբաղում շփման գծում միջադեպերի հետաքննության մեխանիզմների սահմանման հարցով։ Այս մասին հունիսի 21-ին՝ մամուլի ասուլիսի ժամանակ, ասել է Հայաստանում Ֆրանսիայի արտակարգ եւ լիազոր դեսպան Ժան Ֆրանսուա Շարպանտիեն։
Նրա խոսքով՝ դա Վիեննայում Ղարաբաղի հարցով հանդիպման կենտրոնական հարցերից մեկն էր։ «Մեզ համար դա առանցքային նշանակության հարց է։ Դա հնարավորություն կտա ամրապնդել վստահության միջոցները։ Դա նաեւ նախատեսում է երկրորդ բաղադրիչ՝ ԵԱՀԿ գործող նախագահի անձնական ներկայացուցիչ պարոն Կասպշիկի գրասենյակի եւ վերահսկման մեխանիզմների լիազորությունների ընդլայնում, որոնք թույլ կտան բացահայտել ապրիլի սկզբին տեղի ունեցած միջադեպերը»,– նշել է դեսպանը։
Նրա խոսքով՝ Ֆրանսիան գործընկերների հետ ակտիվ աշխատում է այդ ուղղությամբ։ «ԵԱՀԿ շրջանակներում այսօր ակտիվ աշխատանքներ են տարվում»,– ընդգծել է Շարպանտիեն։ Դեսպանը նաեւ պարզաբանել է, որ խոսքը ղարաբաղյան հակամարտության գոտի խաղաղապահներ տեղակայելու մասին չէ, այլ շփման գծում միջադեպերի հետաքննության մեխանիզմներ տեղակայելու։
