Ավելի քան 40 հազար ստորագրություն է հավաքել change.org. կայքում տեղադրված այն հանրագիրը, որը պահանջում է Երեխաների իրավունքների պաշտպան Պավել Աստախովի հրաժարականը:
Խնդրագրի հեղինակ մոսկվացի Եգոր Ռեշետովը նշում է, որ մեկ օրում այն հավաքել է անհրաժեշտ ձայների մեկ երրորդից ավելին:
Նման խնդրագրի համար առիթ է դարձել «դե ինչ, ո՞նց լողացիք» հարցը, որը օմբուդսմենը տվել էր Կարելիայում փոթորկից փրկված երեխաներին: «Մենք այս արտահայտությունը համարում ենք անմարդկային ու սահմանափակ մտածողության, դաժանության ու ցինիզմի սահմռկեցուցիչ դրսեւորում մի մարդու կողմից, որի պարտականությունն է պաշտպանել երեխաների իրավունքներն ու շահերը»,- նշված է հանրագրում, հայտնում է Lenta–ն:
Հունիսի 23-ին Աստախովը հիվանդանոցում հանդիպել էր այն երեխաների հետ, որոնք փիկվել էին Սյամոզերոյի փոթորկից, ու աղջիկներին հարցրել, թե ինչպես են նրանք լողացել: Երեխաները չգիտեին, թե ինչպես պատասխանեն այդ հարցին: Ավելի ուշ Երեխաների իրավունքների պաշտպանը բացատրել է, որ իր հարցը ենթատեքստից կտրված էր:
Հունիսի 18-ին երկու նավակ ու մի լաստ՝ Կարելիայի մանկական ճամբարի երեխաներով, ընկել էր փոթորկի մեջ Սյամոզերոյում: Արշավին մասնակցում էր 51 մարդ, այդ թվում չորս մեծահասակ: Հայտնաբերվել է 13 երեխաների դի, եւս մեկ երեխա անհետ կորած է համարվում: