Պաշտպանության եւ անվտանգության հարցերում Հայաստանը եւ Լեռնային Ղարաբաղն ապավինում են առաջին հերթին սեփական ուժերին: Այդ մասին ասել է ԱԳ նախարարի տեղակալ Շավարշ Քոչարյանը գերմանական Die Tagespost թերթին տված հարցազրույցում՝ պատասխանելով հարցին, թե Ռուսաստանը, կարծես թե, հանդիսանում է Հայաստանին պաշտպանող ուժը: Սակայն միեւնույն ժամանակ, Մոսկվան նպաստում է Ադրբեջանի զինմանը: «Միեւնույն ժամանակ Հայաստանը տարբեր երկրների եւ միջազգային կառույցների հետ իր համագործակցության խորացումը դիտարկում է՝ որպես զսպող գործոն տարածաշրջանում կայունության խախտման դեմ: Այդ նպատակին է ծառայում նաեւ Հայաստանի ռազմա-քաղաքական համագործակցությունը Ռուսաստանի հետ:
Ռուսաստանը Հարավային Կովկասն ավանդապես համարում է իր ազդեցության գոտին եւ փորձում է իր շահերից բխող հավասարակշռված քաղաքականություն վարել տարածաշրջանի երկրների հետ: Հավասարակշռված քաղաքականություն վարելը բխում է նաեւ իր ներգրավմամբ Լեռնային Ղարաբաղի խաղաղ կարգավորման գործընթացում՝ որպես Մինսկի խմբի երեք համանախագահներից մեկը»,- նշել է Քոչարյանը:
Նրա խոսքով, Ռուսաստանի միջնորդությամբ էր, որ 1994թ. մայիսին կնքվեց եռակողմ՝ Ադրբեջան, Լեռնային Ղարաբաղ եւ Հայաստան, հրադադարի մասին համաձայնագիրը, ինչը հանդիսանում է ԵԱՀԿ Մինսկի խմբի շրջանակում ընթացող խաղաղ բանակցային գործընթացի հիմքը: Այդ զինադադարը խախտվեց այս ապրիլին՝ Ադրբեջանի՝ Լեռնային Ղարաբաղի դեմ նախաձեռնած ագրեսիայով: Եվ կրկին Ռուսաստանի միջնորդությամբ ապրիլի 5-ին ձեռք բերվեց բանավոր պայմանավորվածություն՝ վերականգնելու 1994թ զինադադարի ռեժիմը:
Անդրադառնալով Եվրոպայի քաղաքականությանը՝ Քոչարյանը շեշտել է, թե Եվրոպան իր ներդրումը կարող է բերել՝ թույլ չտալու Ադրբեջանին հետ կանգնելու մայիսի 16-ին Վիեննայում Հայաստանի եւ Ադրբեջանի նախագահների միջեւ ձեռք բերված պայմանավորվածություններից: «Այդ պայմանավորվածություններով նախատեսված ԵԱՀԿ օժանդակությամբ ղարաբաղա-ադրբեջանական շփման գծի եւ հայ-ադրբեջանական սահմանի երկայնքով հետաքննությունների մեխանիզմի ներդրումը հնարավորություն կընձեռնի բացահայտել յուրաքանչյուր միջադեպի դեպքում հրադադարի ռեժիմի խախտման նախաձեռնողին:
Տվյալ մեխանիզմի ներդրումը, ինչպես նաեւ ԵԱՀԿ գործող նախագահի անձնական ներկայացուցչի մոնիտորինգային թիմի եւ կարողությունների ավելացումը կնպաստեն հրադադարի ռեժիմի ամրապնդմանը եւ նոր ռազմական գործողությունների բացառմանը, ինչն անհրաժեշտ պայման է բանակցային գործընթացն արդյունավետ իրականացնելու համար»,- ասել է նա: