Լիբանանյան բանակը Սիրիայի հետ սահմանամերձ տարածքներում գտնվող փախստականների ճամբարներում Սիրիայի 103 քաղաքացու է ձերբակալել, ասվում է բանակի հրամանատարությամ հայտարարության մեջ, հաղորդում է «ՌԻԱ Նովոստին»:
«Բաալբեք շրջանում տեղակայված բանակի ստորաբաժանումներն այսօր առավոտյան ռեյդեր են իրականացրել փախստականների ճամբարներում՝ Աթ Թայբե, Ալ Խամուդիա, Թել Աաբյադ, Ալ Հդեյդա ու Դուրս բնակավայրերում: Ձերբակալվել է Սիրիայի 103 քաղաքացի, որոնք ապօրինի են գտնվում Լիբանանի տարածքում»,- գրված է հայտարարության մեջ:
Հունիսի 28-ին Բաալբեք շրջանում՝ Սիրիայի հետ սահմանին գտնվող Էլ Կաա քաղաքում ահաբեկիչները երկու ահաբեկչություն էին իրականացրել: Պայթյունների առաջին շարքը իրականացրել են չորս մահապարտ ահաբեկիչները՝ տեղական ժամանակով ժամը 4:00-ին, ինչի հետեւանքով վեց մարդ է զոհվել ու 17-ն էլ վիրավորվել:
Ահաբեկչությունների երկրորդ շարքը կատարվել է ժամը 22:00-ին քաղաքի կենտրոնում: Երկու մահապարտ պայթեցրել են իրենց՝ ինչի հետեւանքով վիրավորվել է ութ խաղաղ քաղաքացի:
Բաալբեքի նահանգապետը իր հերթին պարեկային ժամ է սահմանել սահմանամերձ քաղաքների փախստականների ճամբարներում ու սիրիացիներին արգելել լքել իրենց գտնվելու վայրը:
Լիբանանյան բանակը Էլ Կաա շրջան է բերել լրացուցիչ ուժեր: Իսկ բուն բնակավայրում ու դրա շրջակայքում ուժեղացվել են անվտանգության միջոցառումները: Սահմանամերձ տարածքներում միջոցառումներ են անցկացվում՝ ահաբեկիչների խմբեր հայտնաբերելու համար: Բանակի հրետանին օրական մի քանի անգամ կրակ է բացում կիրճերի ուղղությամբ՝ զինյալների դիրքերին: