Իսրայելում Թուրքիայի եւ Թուրքիայում Իսրայելի դեսպանի նշանակումը կսկսվի ընթացիկ շաբաթ, մինչ այդ կողմերը հարաբերությունների կարգավորման համաձայնագիր են ստորագրել, հայտնում է Ֆրանս Պրեսը:
«Այս շաբաթ մենք կսկսենք դեսպանների նշանակման գործընթացը», — հայտնել է Թուրքիայի նախագահ Իբրահիմ Կալինը` Անկարայում ելույթ ունենալով լրագրողների առաջ: Ավելի վաղ հաղորդվել էր, որ երկու երկրներում դեսպանատներն իրենց աշխատանքը կվերսկսեն «մոտ ժամանակներս»:
Նախօրեին Իսրայելի եւ Թուրքիայի կառավարության ղեկավարները հայտնել էին վեց տարվա փոխադարձ օտարացումից հետո հարաբերությունների կարգավորման պայմանավորվածության ձեռքբերման մասին: Համաձայնագրերի ստորագրման պաշտոնական արարողությունները տեղի են ունեցել երեքշաբթի: Գործարքը ենթադրում է դեսպանների վերադարձ Թել Ավիվ եւ Անկարա, համատեղ աշխատանք Գազայի հատվածում մարդասիրական իրավիճակի կարգավորման ուղղությամբ, ինչպես նաեւ գազային ոլորտում համագործակցության հաստատում:
Թուրքիան եւ Իսրայելն անցյալում ռազմավարական գործընկերներ էին, բայց իրարից հեռացել էին թուրքական արտաքին քաղաքականության վերաուղղորդման հետեւանքով` եվրոպական ինտեգրացիայից դեպի արաբամահմեդական աշխարհում դիրքերի ամրապնդում: Փոխադարձ սառեցման գագաթնակետ էր դարձել 2010-ին իսրայելական «կոմանդոսների» կողմից այն նավերի գրավումը, որոնք ընթանում էին ի հեճուկս Գազայի հատվածի շրջափակման, եւ նավարկության մասնակից ինը թուրքի մահը: Անկարան հարաբերությունների կարգավորման համար Իսրայելից պահանջում էր ներողություն միջադեպի համար, զոհված թուրք քաղաքացիների ընտանիքներին փոխհատուցման վճարում, ինչպես նաեւ Գազայի հատվածի ապաշրջափակում:
