Ռուսաստանն ու Թուրքիան կվերականգնեն իրենց փոխգործակցությունը սիրիական ճգնաժամի կարգավորման ճանապարհների որոնման գործում: Այս մասին հայտնել է ՌԴ արտգործնախարար Սերգեյ Լավրովը, հայտնում է «ՌԻԱ Նովոստին»:
«Մենք մինչեւ վերջերս Թուրքիայի հետ շատ սերտ կապեր ունեինք սիրիական կարգավորման հարցով: Հետո դրանք ընդհատվել են հասկանալի պատճառներով: Հիմա, երբ Թուրքիայի նախագահը ներողություն է խնդրել Ռուսաստանի նախագահից, երբ նրանք այսօր հեռախոսով քննարկել են մեր հարաբերությունների կարգավորումը, ինձ թվում է մենք մեր թուրք գործընկերների հետ կվերականգնենք փոխգործակցությունը սիրիական կարգավորման ճանապարհների որոնման ուղղությամբ»,- ասել է Լավրովը ֆրանսիացի գործընկեր Ժան Մարկ Էյրոյի հետ բանակցություններից հետո մամուլի ասուլիսի ժամանակ:
«Թուրքիայից, ինչպես գիտեք, շատ բան է կախված, ու ՄԱԿ-ի որոշման մեջ ամրագրված է կոչ բոլոր երկրներին՝ օգնել տարածաշրջանային տերություններին, թույլ չտալ իրենց տարածքի օգտագործումը ահաբեկիչների ու նրանց կողմից, ովքեր աջակցում են Սիրիայում, Իրաքում ու այլ վայրերում գործող ահաբեկիչներին»,- հավելել է նա:
Հունիսի 29-ին կայացել է Պուտինի ու Էրդողանի հեռախոսազրույցը: Թուրքիան վստահեցրել է, որ կանի այն ամենն ինչ իրենից է կախված իր տարածքում ռուսաաստանցիների անվտանգությունն ապահովելու համար: Պուտինը հանձնարարել է կառավարությանը չեղարկել Թուրքիայի նկատմամբ վարչական սահմանափակումները զբոսաշրջության ոլորտում: